දිලිත් යැයි කියනවාට වඩා හොඳින් ඇන්ටිජන් යැයි පැවසූ විට දිලිත් ජයවීරව රටේ ජනාතව දන්නා බව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ අද පාර්ලිමේන්තුවේදි පැවසුවේය.
ඔහු මේ බව ප්රකාශ කළේ දිලිත් ජයවීර විසින් සිදුකළ දීර්ඝ විවේචනයකින් අනතුරුව මතුවුන ප්රශ්න කීපයක් සම්බන්ධව මතුකරමිනි. දිලිත් ජයවීර අද ප්රකාශ කළේ ආදායම් වියදම් වාර්තාවක් පවත්වාගෙන යන ඕනෑම පුද්ගලයෙකුට මැතිවරණයට පෙර ආණ්ඩුව ලබා දුන් පොරොන්දු එකක්වත් ඉටු කළ නොහැකි බව තේරුම් ගත හැකි බවත් ක්ලීන් ශ්රී ලංකා ව්යාපෘතිය ආරම්භ කිරීමට පෙර කළ යුත්තේ තමන් දුන් පොරොන්දු එකක්වත් ඉටු කළ නොහැකි බවට ජනතාව අභිමුවට ගොස් පවසා ජනතාවගෙන් සමාව අයැදීම බවත්ය.
එමෙන්ම තමන් ව්යවසායකයෙක් බව කී දිලිත් ජයවීර තමන් සපත්තු ඇඳුම් බෙල්ට් කාගෙන් හෝ ඉල්ලාගෙන අඳින කෙනෙක් නොව, ජූලි වර්ජකයෙකුගේ පුතෙක් ලෙස ගමෙන් කොළඹ පැමිණ කොළඹ අතික්රමණය කළ පුද්ගලයෙක් බව පැවසුවේය. එමෙන්ම තමන් පාර්ලිමේන්තුවට පැමිණියේ පාර්ලිමේන්තු කැන්ටිමෙන් කෑම කන්නට නොව ව්යවසායකයෙක් ලෙස පාර්ලිමේන්තුවට යමක් ලබා දීමට බව ද ඔහු පෙන්වා දුන්නේය.
එමෙන්ම මෙම පාර්ලිමේන්තුව කැලණිය විශ්වවිද්යාලයේ මහා ශිෂ්ය සාභාව නොව රටට වගකිවයුතු ආයතනයක් බවත්, ජනතාව විශ්වාස කළ සුසමාදර්ශය මේ පාර්ලිමේන්තුවේ නැති බවත් කී දිලිත් ජයවීර තමන් සමග සරසවියේ සිටි සරසවි මිතුරන් ද ආණ්ඩුවේ සිටින බව පැවසුවේය . ජනතා විමුක්ති පෙරමුණේ ෆ්ලැට් න්යාය කුඩු කර දැම්මේ කෙසේ දැයි ඒ සරසවි මිතුරන් දන්නා බව ද කීවේය.
ඒ අතර තමන් ඇන්ටිජන් විකුණුවේ අඩුම මිලට බවත් එකක් 1146.20ක් බව සෞඛ්ය ඇමතිවරයාගේ ප්රකාශයක් ලෙස හැන්සාඩ්හි වාර්තාගත වී ඇති බවත් පැවසුවේය.
මේ දීර්ඝ කතාවට කෙටි පිළිතුරක් ලබා දෙමින් වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ පැවසුවේ වීදුරු ගෙවල්වල සිට ගල් නොගසන ලෙසය. අමු බොරු නොකියන ලෙසය.
“දිලිත් ජයවීර මන්ත්රීතුමත් මේක ඇතුළෙ ඉඳලා බොරු කතාවක් කියලා ගියා මේ ඇන්ටිජන් සම්බන්ධයෙන්. මොකද ඇන්ටිජන්වලට එතුමත් සමබන්ධයි. දිලිත් කිව්වට වඩා ඇන්ටිජන් කිව්වම රටේ මිනිස්සු දන්නවා එතුමව.”
“ඒ කියන්නේ ව්යසනයක් ආපු වෙලාවක ඇන්ටිජන් රටට එන්න කලින් දිලිත් ඇන්ටිජන් රටට ගේන්න ගියා. හැබැයි ඇන්ටිජන් ගේන්න යනකොට සෞඛ්ය අමාත්යාංශයේ ලියාපදිංචිවත් නොකරපු ජොර්ජ් ස්ටුවට් සමාගමට අයිති අනුබද්ධ ආයතනයක් එකක් ගෙනාවා. අඩුම ගානේ සෞඛ්ය අමාත්යාංශයේ ලියාපදිංචි වෙලා තිබුණේ නෑ. ”
“ගනුදෙනුව කෝටි 220ක්. බිලියන 2.2ක් වටිනාකමක් තියන ගනුදෙනුවක් තමයි මේ සමාගමත් එක්ක කළේ. ඒක විතරක් නෙමෙයි ගරු කාරක සභා සාභාපති තුමියනි. මේ ගනුදෙනුවත් එක්ක ඔහුගේ සමාගම සම්බන්ධ හෝටල්වලට නිරෝධායන කටයුතු සඳහා කටුනායකින් එන අයට කටුනායකයින් බස්වලට නන්වලා අරන් ගිය බිස්නස් එක කළෙත් මෙතුමා සම්බන්ධව. ”
“ඒ නිසා සමහර අයට කියනවා වීදුරු ගෙවල්වල ඉඳන් ගල් ගහන්න එපා කියලා. “
