මනම්පිටිය නිමල් ජයරත්න –
ඓතිහාසික දිඹුලාගල ආරණ්ය සේනාසනයට අයත් කොස්ගහඋල්පොත පිරිනිවන් මඤ්චක ප්රදේශයේ භාවනායෝගීව වැඩවාසය කරන භික්ෂූන්වහන්සේලාගේ යහපත සඳහා දායකයින් විසින්, කොස්ගහ උල්පත පිවිසුම් මාර්ගයේ ඉදිකරන ලද තාවකාලික ඉලූක් හා පොල් අතු පැල්පතකට ඊයේ (9) රාත්රියේ කිසියම් පිරිසක් ගිනිතබා විනාශ කර ඇති බව ඓතිහාසික දිඹුලාගල ආරණ්ය සේනාසනාධිපති දිඹුලාගල රාහුලාලංකාර නාහිමියෝ සඳහන් කළහ.
මෙම තාවකාලිකව පැල්පතට ගිනි තැබීම පිළිබඳ කොස්ගහ උල්පොතේ භාවනායෝගීව වැඩවාසය කරන ත්රිකුණාමලයේ සිරිධම්මාලංකාර හිමියන් විසින් මනම්පිටිය පොලිසියට පැමිල්ලක් ඉදිරිපත් කර ඇති බවද නාහිමියන් සඳහන් කළහ.
ගිනි තැබීම හේතුවෙන් තාවකාලිකව ඉදිකරන ලද ඉලුක් හා පොල්පතු අට්ටාලය සම්පූර්ණම විනාශ වී ඇති අතර මේ පිළිබඳව අරලගංවිල විශේෂකාර්ය බළකාය සහ මනම්පිටිය පොලිස් ස්ථානයේ නිලධාරීන් පිරිසක් එම ස්ථානයට ගොස් පරීක්ෂණයක් සිදු කර ඇති බවද රාහුලාලංකාර නාහිමියෝ පැවසූහ.
අප මේ පිළිබඳව මනම්පිටිය පොලිස් ස්ථානාධිපති අසේල සරත් කුමාරොගෙන් දුරකථනයෙන් කළ විමසීමකදී ඒ මහතා සඳහන් කළේ මේ පිළිබඳව පොලිස් ස්ථානයේ නිලධාරි කණ්ඩායමක් එම ස්ථානයට යවා පරීක්ෂණයක් ආරම්භ කර ඇති බවත්, මෙතෙක් කිසිවකුත් අත්අඩංගුවට ගෙන නොමැති බවත්ය. ඒ පිළිබඳ පුළුල් පරීක්ෂණ ආරම්භ කර ඇති බව ඔහු කීවේය.
