රඹුක්කන දැලිවල කොටවෙහෙරේ ලෝක උරුමය කොල්ල කෑ අපරාධකරුවන් සම්බන්ධව කෑගල්ල දිස්ත්රික් භාර සහකාර පොලිස් අධිකාරීවරයාගේ ඍජු අධීක්ෂණය යටතේ කොට්ඨාස අපරාධ විමර්ශන අංශය විසින් මෙතෙක් සිදුකරන ලද විමර්ශන සඳහා පොලිස්පති නියමයෙන් අපරාධ පරීක්ෂණ දෙපාර්තමේන්තුව විමර්ශන කණ්ඩායමක්ද අනුයුක්ත කිරීමට තීරණය කළ බව පොලිස් මූලස්ථානය නිවේදනය කරයි.
මෙම විමර්ශන කඩිනම් කිරීම සදහා විමර්ශන කණ්ඩායම්වලට විශේෂ උපදෙස් පොලිස්පතිවරයා විසින් ලබා දී තිබේ.
ඒ අනුව කෑගල්ල කොට්ඨාසය අපරාධ විමර්ශන අංශයේ නිලධාරීන් සහ අපරාධ පරීක්ෂණ දෙපාර්තමේන්තුවේ නිලධාරීන් විසින් මෙම සොරකම සම්බන්ධව විමර්ශන කටයුතු සිදු කරනු ඇතැයි පොලිස් දෙපාර්තමේන්තුව පවසයි.
මේ වනවිට සැකකරුවන් පැමිණි ආකාරය හඳුනා ගැනීම සඳහා ප්රදේශයේ සීසීටීවී දර්ශන පරීක්ෂා කරමින් පවතින අතර කොට්ඨාස බුද්ධි අංශයේ නිලධාරීන් යොදවා අවශ්ය තොරතුරු ලබා ගැනීම සිදුකරමින් ඇත.
මේ සොරකම සම්බන්ධව යම් තොරතුරක් වෙතොත් රඹුක්කන පොලිස් ස්ථානධිපතිවරයාගේ දුරකථන අංක 071-8591419 හෝ කෑගල්ල සහකාර පොලිස් අධිකාරී ප්රදීප් වීරසේකර ගේ 071 8592038 දුරකතන අංකවලට දැනුම් දෙන ලෙස මහජනයාගෙන් ඉල්ලා සිටී.
දැලිවල කොටවෙහෙර කඩා රැගෙන ගොස් තිබුණේ ලෝකයේ හොඳින්ම ආරක්ෂා වී තිබූ විශිෂ්ටම පෞරාණික දාගැබ් ආකෘතිය සේ සැලකෙන දෙවනපෑතිස් රජ දවස මිහිඳු හිමියන්ගේ අනුශාසනා මත නිර්මාණය කළ රන්මුවා කරඬුව ඇතුළු ඒ වකවානුවටම අයත් වසර දෙදහස් දෙසීයක් පැරණි කරඬු 09කි.
