ගම්පහ , මාකෙවිට ප්රදේශයේ පදිංචි සිටින පවුලක මත්ද්රව්ය වලට ඇබ්බැහි වූවකු වන සුළු පියා විසින් මුදල් ලබා ගැනීම පිණිස සිය දෙවැනි විවාහයේ බිරියගේ 14 හැවිරිදි දියණියට පහරදීමේදී ඇය මියගිය පසුව වැසිකිළි වලකට දමා කළ සැඟවූ අපරාධයක් හෙළි කරගැනීමට ගම්පහ මූලස්ථාන පොලිසිය සමත් වී තිබේ.
ඝාතනයට ලක්ව ඇත්තේ හිමාෂා සඳරුවනි නමැති 14 හැවිරිදි දැරියක බව පොලීසිය පවසයි.
වාර්තාවන පරිදි සිද්ධිය මෙසේය.
පසුගිය බ්රහස්පතින්දා (05) තම වයස අවුරුදු 14ක් වූ දියණිය අතුරුදහන්ව ඇති බවට මවක් විසින් ගම්පහ පොලිස් පැමිණිල්ලක් ඉදිරිපත් කරනු ලැබුවේය. එම පැමිණිල්ලට අනුව විමර්ශන මෙහෙයවූ පොලිසියට වාර්තා වන්නේ පැමිණිලිකාර මව තම දෙවන විවාහයේ ස්වාමිපුරුෂයා සහ දියණිය සමග මාකෙවිට ප්රදේශයේ ඉදිකරමින් පවතින වෙනත් අයෙකුට අයත් තෙමහල් නිවසක තාවකාලිකව පදිංචිව සිට ඇති බවය.
දෙවන විවාහයේ පුද්ගලයා පෙදරේරුවෙකු වශයෙන්ද, පැමිණිලිකාරිය ඒකල ප්රදේශයේ පුද්ගලික ඇඟලුම් කම්හලක ද රැකියාවක් සිදු කරමින් සිට ඇත.
2024.12.02 වන දින තම සැමියා සහ දියණිය නිවසේ සිටියදී කාන්තාව උදෑසන රැකියාවකට ගොස් රාත්රීයේ නැවත නිවසට පැමිණ දියණිය නිවසේ නොසිටිම පිළිබඳ සැමියාගෙන් විමසීම් සිදු කර ඇත.
එහිදී ඔහු පවසා ඇත්තේ දියණිය යහලුවෙකුගේ පවුලේ සාමාජිකයින් සමග විනෝද චාරිකාවක් ගොස් ඇති බවටත් එදින නොපැමිණෙන බව හා පසුදින පැමිණෙන බවත්ය.
දියණිය 2024.12.05 වන දින දක්වාම නිවසට නොපැමිණිම හේතුවෙන් දෙදෙනා අරවුල් ඇති කරගෙන ඇති අතර, පසුව පොලිස් ස්ථානය වෙත පැමිණිල්ලක් ඉදිරිපත් කර ඇත.
එහිදී තම සැමියා, දැරියගේ අතුරුදන්වීම සම්බන්ධයෙන් සැක බව ද කාන්තාව විසින් ප්රකාශ කර ඇත.
සිද්ධිය සම්බන්ධව විමර්ශනය සිදුකළ පොලිස් නිලධාරීන් විසින් වයස අවුරුදු 42ක් වන පැමිණිලිකාරියගේ පුරුෂයා අත්අඩංගුවට ගෙන විමර්ශන සිදුකරන ලදී. මිනීමැරුම හෙළි වන්නේ එහිදී ය.
2024.12.02 වන දින බිරිඳ විසින් ඇයට අයත් තම සැමියා විසින් උකසට තබන ලද රන් මාලයක් නිදහස් කර ගැනීම සඳහා දියණියට මුදල් ලබා දී තම පියා සමග ගොස් එම රන් මාලය නිදහස් කර ගන්නා ලෙසට ප්රකාශ කර බිරිඳ රැකියා ස්ථානයට ගොස් ඇත.
මොහු තදින් මත්ද්රව්ය සඳහා ඇබ්බැහි වූවෙකි. බිරිය නිවසින් ගිය පසු දියණියට රන් භාණ්ඩ බේරා ගැනීමට දුන් මුදල ඔහු දියණියගෙන් ඉල්ලා තිබේ. එම මුදල් ලබා දීම දියණිය විසින් ප්රතික්ෂේප කිරීම හේතුවෙන් මෙම පුද්ගලයා දියණියට පහරදී මුදල් පැහැරගෙන නිවසින් පිටව ගොස් ඇත.
පසුව නිවසට පැමිණි ඔහු දියණිය පහරකෑ ස්ථානයේම වැටී සිටි නිසා ඇය පරික්ෂා කිරීමේදී මියගොස් සිටි බැවින් දැරියගේ මෘත ශරීරය ඉටි කවරයක බහා ඉදිකරමින් පවතින නිවසේ වැසිකිලි වලකට දමා වසා දැමීමට කටයුතු කර තිබේ.
අනාවරණය කර ගත් තොරතුරු මත ගම්පහ මහෙස්ත්රාත් අධිකරණයේ නියෝග පරිදි වැසිකිලි වලේ වලදමා තිබූ දියණියගේ සිරුර ගොඩගෙන පශ්චාත් මරණ පරික්ෂණය සඳහා ගම්පහ රෝහලේ මෘත ශරීරාගාරයේ තැන්පත් කර ඇත.
අත්අඩංගුවට ගත් සැකකරු 2024.12.06 වන දින ගම්පහ මහෙස්ත්රාත් අධිකරණයට ඉදිරිපත් කිරීමෙන් පසු 2024.12.16 වන දින දක්වා රක්ෂිත බන්ධනාගාර ගත කර තිබේ. සිද්ධිය සම්බන්ධයෙන් ගම්පහ පොලීසිය වැඩිදුර විමර්ශන සිදුකරයි.
