ජයකාන්ත ලියනගේ – බළපිටිය –
දකුණු ආසියාතික හා ආසියාතික කරාතේ ශූරතා තරගාවලියේ වයස අවුරුදු 16/17 කාණ්ඩයේ පිරිමි කුම්තේ ඉසව්ව සදහා සහභාගි වීමට අම්බලන්ගොඩ ගා/ශ්රී දේවානන්ද විද්යාලයේ ඩබ්ලිව් බාසුරු විරාජිත ද සිල්වා ක්රීඩකයා සුදුසුකම් ලබා තිබේ. තරගාවලියට සහභාගී වීම සදහා ඩබ්ලිව් බාසුරු විරාජිත ද සිල්වා ක්රීඩකයා හෙට (15) සවස ශ්රී ලංකාවෙන් පිටත්ව යෑමට නියමිතය.
දකුණු ආසියාතික හා ආසියාතික කරාතේ ශූරතා මෙම තරගාවලිය, 2024 ජූලි 17 වන දින සිට 21 වන දින දක්වා භූතානයේදී පැවැත්වේ. මේ අනුව ශ්රී ලංකා කරාතේ ජාතික කණ්ඩායම නියෝජනය කිරීමට බාසුරු විරාජිත ක්රීඩකයාට අවස්ථාව හිමි වේ.
ඔහුට මෙම අවස්ථාව හිමිව ඇත්තේ 2024 ශ්රී ලංකා කරාතේ දෝ සම්මේලනය මගින් පවත්වන ලද විවෘත කරාතේ ශූරතා තරගාවලියේ වයස අවුරුදු 16/17 කාණ්ඩයේ කුම්තේ ඉසව්වේ රන් පදක්කම හිමි කර ගනිමින් ශ්රී ලංකා කරාතේ පුහුණු සංචිතයට තෝරා ගැනීමත් සමගය.
අම්බලන්ගොඩ, ගා/ශ්රී දේවානන්ද විද්යාලයේ 2015 වර්ෂයේ තුන් (03) වන ශ්රේණියේ අධ්යාපනය ලබමින් සිටියදී බාසුරු විරාජිත කරාතේ ක්රීඩාවට අත් පොත් තබා තිබේ. ඔහු මේ වන විට පසුගිය අපොස (සා.පෙළ) විභාගයට පෙනී සිට ප්රතිඵල බලාපොරොත්තුවෙන් සිටී. වසර 08 කට අධික කාලයක් කරාතේ ක්රීඩාවේ නිරත වන බාසුරු, කලුපටි පළමු ශ්රේණි ධාරියෙකි.
2017 වසරේ වයස අවුරුදු 13 න් පහළ කුම්තේ ඉසව්වේ ජාතික කරාතේ තරගාවලියේ රන් පදක්කම, 2018 වයස අවුරුදු 13 න් පහළ, 2022 වයස අවුරුදු 16 න් පහළ කුම්තේ ඉසව්වේ ජාතික කරාතේ තරගාවලියේ ලෝකඩ පදක්කම, 2022 වයස අවුරුදු 16 න් පහළ ශ්රී ලංකා පැසැල් ජේෂ්ඨ තරගාවලියේ ලෝකඩ පදක්කම, 2023 හා 2024 වයස අවුරුදු 18 න් පහළ කුම්තේ ඉසව්වේ ජාතික කරාතේ තරගාවලියේ රන් පදක්කම දිනා ගැනීමට බාසුරු විරාජිත ක්රීඩකයා සමත්ව තිබේ. එයට අමතරව ඔහු පාසැල් හා විවෘත කලාප, දිස්ත්රික් හා පළාත් මට්ටමින් මෙන්ම ජාතික මට්මින්ද තරගාවලි රැසක ජයග්රහණ ලබා ගෙන තිබේ.
ප්රසාද් මෙන්ඩිස්, පළමු කරාතේ ගුරුතුමා මෙන්ම සුදත් නලින්ද හා සුසන්ත සොයිසා වර්තමාන කරාතේ ගුරුවරුන් ගෙන් ලැබූ පුහුණුව මෙම ගමන ඒමට පූර්ණ වශයෙන්ම ඉවහල් වූ බව බාසුරු විරාජිත ක්රීඩකයා කියයි. එයට අමතරව ගා/ශ්රී දේවානන්ද විද්යාලයේ කරාතේ ක්රීඩාව භාර ආචාර්යය වරුන් වන ප්රදීප් දිසානායක සහ ඒ එම් සී ක්රිෂාන්ති යන ගුරුවරුන්ගේ මග පෙන්වීමද ඔහු ගෞරවයෙන් සිහිපත් කරයි.
බාසුරු විරාජිත ක්රීඩකයා ජාතික කරාතේ ශූරතා තරගාවලි දෙකක ජයග්රහණ වලින් පසුව පදක්කම් සහ සහතික අතැතිව සිටින අයුරු ඉහත ඡායාරූප වල දැක්වේ.
