දිනසේන රතුගමගේ –
දෙසැම්බර් මස 8 වෙනිදා සිට උතුරු පළාතට නොකඩවා ඇදහැලෙන ධාරානිපාත වර්ෂාව හේතුවෙන් අද ( 17 ) උදෑසන වන විට පවුල් 3885 කට අයත් වැසියන් 10287 ක් විපතට පත්ව සිටින බව ඒ ඒ පළාත් වල දිස්ත්රික් ලේකම්වරුන්ගේ සංඛ්යා ලේඛනවල සදහන් වෙයි.
වැඩිම පිරිසක් විපතට පත්ව සිටින්නේ මුලතිව් දිස්ත්රික්කයේ වන අතර පවුල් 1063 කට අයත් පුද්ගලයින් 3083 ක් මුලතිව් දිස්ත්රික්කයේ විපතට පත්ව සිටිති.
කිළිනොච්චියේ පවුල් 984 කට අයත් පුද්ගලයෝ 2348 ක්ද,මන්නාරමේ පවුල් 712 ක පුද්ගලයෝ 1825 ක්ද,වවුනියාවේ පවුල් 614 කට අයත් වැසියන් 1612 ක්ද, යාපනයේ පවුල් 512 කට අයත් වසියන් 1419 ක්ද ,වර්ෂාව හේතුවෙන් විපතට පත්වූවෝ අතර වෙති.
මේ පුද්ගලයින්ගෙන් පුද්ගලයින් 6789 ක් ආරක්ෂිත ස්ථාන කරා ගොස් ඇති අතර අනෙක් පිරිස ඥාතීන් සමීපයේ හා ඔවුන්ගේ ජලයෙන් යට වූ නිවාස තුළම ජීවත් වෙති.
ආරක්ෂිත ස්ථාන වලට පැමිණි ජනතාවට පිසූ ආහාර සපයා දීමටත් පැදුරු කොට්ට ලබා දීමටත් ඒ ඒ පළාත් වල ප්රාදේශීය ලේකම්වරුන් හා ආපදා කලමනාකරණ මධ්යස්ථාන වල නිලධාරීන් පියවර ගෙන ඇති අතර ,මෙම කටයුතු සදහා යුද හමුදාවද එක් වී සිටිති.
දේපල අලාභානි
වර්ෂාව හේතුවෙන් මුලතිව් දිස්ත්රික්කය ඇතුලු සෙසු ප්රදේශ වල නිවාස 108 ක් සම්පූර්ණයෙන්ම කඩා වැටී ඇත.
අර්ධ හානි සිදුව ඇති නිවාස සංඛ්යාව 364 කි.
උතුරේ ගොවීන් විසින් වගා කොට තිබූ කුඹුරුඅක්කර 21750 ක් ජලයට හසු වීම නිසා මුලුමනින්ම විනාශ වී ගොස් තිබේ.
ඉන් අක්කර 6500ක් මුලතිව් පළාතේද කිළිනොච්චියේ 4900 ක්ද, මන්නාරමේ 3900 ක්ද ,වවුනියාවේ 3650 ක්ද ,යාපනයේ 2900 ක්ද වශයෙන් ගණන් බලා ඇත.
උතුරු පළාතට ඉතා දීර්ග කාලයක් තිස්සේ බලපා අති අයහපත් කාලගුණික තත්ත්වය නිසා නොවැම්බර් මස 22 දා සිට ධීවරයින්ට මුහුදු යාමට අවස්ථවක් උදා වී නොමත.
හමුදාවේ මෙහෙයුම්…
මුලතිව් කණ්ඩාවලෙයි ඇතුළු ගම්මාන හතරකට කොටු වී සිටි පවුල් 178 කට අයත් පුද්ගලයින් 512 ක් යුද හමුදා නිලධාරීන් විසින් බේරා ගෙන ආරක්ෂිත ස්ථාන කරා ඊයේ ( 16) රැගෙන ආහ.
අධික වර්ෂාව නිසා ගලා ගිය වැසි ජලයෙන් මහා මාර්ග සියල්ලම යට වී නිවෙස් තුළට ජලය ගලා ඒම නිසා මේ පිරිසට ආරක්ෂිත ස්ථානයක් වෙත යාමට නොහැකි තත්ත්වයක සිටියහ.
මේ පිළිබදව මුලතිව් දිසාපති කාර්යාලය විසින් පළාතේ යුද හමුදා සේනාංක දැණුම්වත් කිරීමෙන් පසුව යුද හමුදා නිලධාරීන් ආරක්ෂිත උපකරණ හා ජලයේ ගමන් කළ හැකි යුද හමුදාව සතු ඉතා උසින් යුතු බෆල් රථ රැගෙන විත් තිබේ.
එහෙත් ජල ධාරිතාවය වැඩි නිසා යුද හමුදාවට එම වාහනවලින් ගමන් කිරීමට පවා නොහැකි තත්ත්වයක් උද්ගත වී තිබූ අතර අවස්ථා කීපයකදීම එම වාහනද ජලය මතම ක්රියා විරහිත වී ඇත.
කෙසේ වෙතත් යුද හමුදා නිලධාරීන් දැඩි පරිශ්රමයක් දරා ජලයට කොටු වී සිටි වැසියන් පිරිස බේරා ගෙන බස් රථවල පටවා ආරක්ෂිත ස්ථාන කරා රැගෙන විත් තිබේ.
දෙමළ දේශපලනඥනයින් මෙම පළාත් වල සිටින හමුදා සේනාංක වලට වහාම ඉවත් වන ලෙස බලපෑම් කරණු ලැබූවත් සෑම වසරකදීම මුලතිව් කිළිනොච්චි පළාත් වලට ගංවතුර තර්ජන පැමිණි වහාම ඔවුන්ව බේරා ගෙන ගොස් ආහාර පාන ඇතුළු සියලු දෙයින් සංග්රහ කරණු ලබන්නේ යුද හමුදා නිලධාරීන් විසිනි.
මේ නිසා එම පළාත් වල සාමාන්ය ජනතාව යුද හමුදාව සමග ඉතා සමීපව කටයුතු කරමින් සිටිති.
