ලලිත් චාමින්ද –
මිල්කෝ පුද්ගලික සමාගමෙන් ත්රිපෝෂ නිෂ්පාදනය සඳහා අවශ්ය කිරිපිටි කිලෝග්රැම් 01ක් රුපියල් 690ක මුදලකට ලබාගත හැකිව තිබියදි ඉකුත් වර්ෂ තුන තුළ කිරිපිටි කිලෝග්රැම් 01ක් සඳහා පිළිවෙළින් රුපියල් 120, 108ක් හා 110ක් වශයෙන් වැඩිපුර ගෙවා තිබු බව ජාතික විගණන කාර්යාලය මගින් නිකුත් කොට ඇති විගණන වාර්තාවක සඳහන් වේ.
ඒ අනුව මිල්කෝ සමාගමට රුපියල් විසි කෝටි අසූපන් ලක්ෂ හැට දහසක මුදලක් ( මිලියන 208.56) වැඩිපුර ගෙවා ඇති බව විගණනය පවසයි. 2017, 2018, හා 2019 යන වර්ෂවලදි පිළිවෙළින් රුපියල් හත් කෝටි හැත්තෑ හැත් ලක්ෂ හැට දහසක්, (මිලියන 77.76 )ක්, රුපියල් හයකෝටි හතලිස් අට ලක්ෂයක් (මිලියන 64.80), රුපියල් හයකෝටි හැට ලක්ෂයක් (මිලියන 66ක්) වැඩිපුර ගෙවා ඇති බවද විගණනය මගින් අනාවරණය කොට ඇත.
අමාත්ය මණ්ඩල තිරණයකට අනුව ත්රිපෝෂ නිෂ්පාදනය සඳහා අවශ්ය කිරිපිටි මිල්කෝ පුද්ගලික සමාගම වෙතින් පමණක් මිලදිගෙන තිබුණි. 2017,2018,2019 යන වර්ෂවලදි කිරිපිටි කිලෝග්රැම් 01ක් සදහා පිළිවෙළින් රුපියල් 810ක්, රුපියල් 798ක් සහ රුපියල් 800ක් එම සමාගම වෙත ගෙවා තිබුණි.
එසේවුවද එම වර්ෂතුන තුළ මිල්කෝ සමාගම විසින් ත්රිපෝෂ සමාගමේ අලෙවි සලට සමාගමේ නියෝජිතයකු මගින් කිරිපිටි කිලෝග්රැම් 01ක් රුපියල් 690ක මුදලකට සපයා තිබු බවද විගණන වාර්තාවේ සදහන් වේ.
මේ පිළිබද විගණනයට මිල්කෝ සමාගම මගින් දන්වා ඇත්තේ සාමාන්ය වෙළදපොළේ විකුණන ලබන කිරිපිටිවලින් සිදුවන පාඩුව අවම කරගැනීම සඳහා රජය මගින් ලබාදෙන මුල්ය සහනය ත්රිපෝෂ සමාගම වෙත ලබාදෙන කිරිපිටි සඳහා ලබා නොදෙන බැවින් මිල ගණන් වෙනස් බවය.
මිල්කෝ සමාගම විසින් ත්රිපෝෂ සමාගමේ අලෙවි සලට කිරිපිටි මිල නිකුත් කරනු ලබන මිල ගණන්මත ත්රිපෝෂ නිෂ්පාදනය සඳහා අවශ්ය කිරිපිටි ලබාගැනිමට මිල්කෝ සමාගම එකඟ කරවාගතයුතු බව විගණනය මගින් නිර්දේශකොට ඇත.
