දිනසේන රතුගමගේ –
ජිනීවා මානව හිමිකම් මණ්ඩලයේ යෝජනාවට අනුව ශ්රී ලංකාවේ ත්රස්තවාදය වැළැක්වීමේ පනත අහෝසි කිරීමක් හෝ එය සංශෝධනය කිරීමක් වහාම සිදු වියයුතු බව සමස්ත ලංකා මුස්ලිම් කොංග්රසයේ නායක පාර්ලිමේන්තු මන්ත්රී රිෂාර්ඩ් බදුයුදීන් පැවසීය.
මාධ්යවේදීන්ට අදහස් දක්වමින් ඊයේ (08) ඔහු කියා සිටියේ ත්රස්තවාදය වැළැක්වීමේ පනත දඩමීමා කරගෙන ශ්රී ලංකාවේ කිසිදු දේශපාලන පක්ෂයක නායකයෙකුට මෙතෙක් විඳීමට සිදු නොවූ කටුක ඉරණමක් තමන්ට අත්කරදීමට රජය කටයුතු කළ බවය.
ත්රස්තවාදය වැළැක්වීමේ පනත තව දුරටත් ක්රියාත්මක වීම නිසා ලෝකයේ බොහෝ රටවල් ශ්රී ලංකාව කෙරෙහි හොද ආකල්පයකින් නොබලන බවත් ජී.එස්.ටී. ප්ලස් බදු සහනය පවා මේ රටට අහිමි කරවීමට මෙම ත්රස්තවාදය වැළැක්වීමේ පනත හේතුවන බවත් රිෂාර්ඩ් බදුයුදීන් මන්ත්රීවරයා කියා සිටියේය.
ශ්රී ලංකාවේ සුලු ජාතීන්ගේ අයිතිවාසිකම් වෙනුවෙන් තමන් දේශපාලනයට පිවිසුණු බව කී මන්ත්රීවරයා මේ වන විට එකම රටක් එකම නීතියක් යන සංකල්පය ඔස්සේ මුස්ලිම් ජනයාට දැඩි විරෝධයක් රාජ්ය පාර්ශ්වයෙන් එල්ල වෙමින් පවතින බවද කියා සිටියේය.
ශ්රී ලංකාව තුළ මුස්ලිම් අන්තවාදයක් නොමැති බවත් කවරෙකු හෝ මුස්ලිම් ජනයාගේ අයිතිවාසිකම් හා ඔවුන්ගේ ප්රශ්න වෙනුවෙන් පෙනී සිටි විට ඔවුන් ජාතිවාදීන් ලෙස හඳුන්වා ඔවුන්ට ලේබල් අලවා ඔවුන්ට මහජනතාව අතරින් විශාල විරෝධයක් එල්ල කරන බව උදාහරණ සහිතව විස්තර කළ මන්ත්රීවරයා මේ තත්ත්වය රටේ පවතින තුරු සියලු දෙනාම එක්සත් වී රට දියුණු කිරීමට නොහැකි වන බවද සඳහන් කළේය.
