ජූලි මාසයේදී 21 හැවිරිදි කාන්තාවකගේ ඛේදනීය සහ අකල් මරණයට හේතු වූ Ceftriaxone නම් ප්රතිජීවක එන්නත, කොළඹ ජාතික රෝහලේ රෝගියෙකු තුළ තවත් අසාත්මිකතාවක් ඇති කර ඇති බව Daily Mirror වාර්තා කරයි.
තෙහෙට්ටු තත්ත්වයක් නිසා දෙසැම්බර් 09 වැනි දින රෝහලට ඇතුළත් කළ මෙම රෝගියාට Ceftriaxone එන්නත් කර ඇති බවත් පසුව රෝගියාගේ සංකූලතා වර්ධනය වී ඇති බවත් වාර්තා වේ.
එන්නත ලබා ගත් වහාම රෝගියාගේ අතෙහි හිරිවැටීමක් ඇති වී ඇති අතර, පසුව ඇති වූ දැඩි සංකූලතා හේතුවෙන් ඔහු දැඩි සත්කාර ඒකකයට ඇතුළත් කර තිබේ.
දැඩි සත්කාර ඒකකයේ සිදු කරන ලද පරීක්ෂණවලට අනුව රුධිර පීඩනය සහ පෙණහලුවල ඔක්සිජන් ප්රතිශතය යන දෙකෙහිම සැලකිය යුතු අඩුවීමක් දැක්නට ලැබී ඇත.
මේ තත්ත්වය තුළ Ceftriaxone එන්නත භාවිතා නොකරන ලෙසත්, ඒ වෙනුවට විකල්ප ප්රතිජීවක භාවිතා කරන ලෙසත් රෝහලේ වෛද්යවරුන්ට ඊයේ උදෑසන වන විට දන්වා තිබූ බව ද ආරංචි මාර්ග උපුටා දක්වමින් Daily Mirror වාර්තා කරයි.
සිද්ධිය සම්බන්ධයෙන් ප්රකාශයක් ලබා ගැනීමට ඉහළ සෞඛ්ය නිලධාරියකු සම්බන්ධ කර ගැනීමට ගත් උත්සාහයන් කිහිපයක් අසාර්ථක වී තිබේ.
Ceftriaxone මෑත අතීතයේ දී රෝගීන් කිහිප දෙනෙකුගේ අසාත්මිකතාවන් සමඟ සම්බන්ධ වීම හේතුවෙන් බරපතල ගැටලුවක් ඇති කර ඇති අතර, එහි ප්රතිඵලයක් ලෙස පේරාදෙණිය ශික්ෂණ රෝහල සහ කෑගල්ල ශික්ෂණ රෝහල වැනි රෝහල්වල මරණ දෙකක් සහ දරුණු සංකූලතා පිළිබඳ සිදුවීම් වාර්තා වී ඇත.
Ceftriaxone යනු බොහෝ බැක්ටීරියා ආසාදන වලට ප්රතිකාර කිරීම සඳහා භාවිතා කරන ප්රතිජීවකයකි
