දිනසේන රතුගමගේ –
යාපනය ඌර්කාවතුරේ අධිකරණයෙන් නිදහස ලැබූ ඉන්දීය ධීවරයින් 12 දෙනෙකු ආපසු ඉන්දියාව බලා පිටත් කොට යැවීම නාවික හමුදාවේ අධීක්ෂණය යටතේ ඊයේ (27) සිදු වුණි.
මෙම ඉන්දීය ධීවරයින් 12 දෙනා පසුගිය ජනවාරි 8 වෙනිදා නාවික හමුදාව විසින් යාපනය මුහුදු සීමාවේදී අත් අඩංගුවට ගෙන තිබුණේ අනවසරයෙන් ශ්රී ලංකා මුහුදු සීමාව ආක්රමණය කිරීමේ චෝදනාව මතය.
ඔවුන් පැමිණි යාත්රා දෙකක්ද නාවික හමුදා බාරයට ගැණුනු අතර එම යාත්රා නාවික හමුදාව බාරයේ තබා ඇත.
ධීවරයින් 12 දෙනා යාපනයේ ධීවර පරීක්ෂක නිලධාරීන් වෙත බාර දීමෙන් පසුව ඔවුන්ව යාපනයේ ඌර්කාවතුරේ අධිකරණයට ඉදිරිපත් කිරීමෙන් පසුව බන්ධනාගාර ගත කෙරුණි.
දෙවන වර ඔවුන්ව අධිකරණයට ඉදිරිපත් කළ අවස්ථාවේදී ඔවුන් 12 දෙනාට මාස 18 ක අත් හිටවූ හිර දඩුවමක් වසර පහක කාලයකට පනවන ලද ඌර්කාවතුරේ විනිසුරු ජේ. ගජනිතිබාලන් එම ධීවරයින්ව ආපසු ඉන්දියාවට යැවීමට පියවර ගන්නා ලෙස ධීවර පරීක්ෂක නිලධාරීන්ට නියෝග කොට තිබුණි.
ඒ අනුව නාවික හමුදාව, යාපනය සහකාර ධීවර අධ්යක්ෂ කාර්යාලය හා යාපනයේ නියෝජ්ය ඉන්දීය මහ කොමසාරිස් කාර්යාලය එක්ව එම ධීවරයින් 12 දෙනාව ඉන්දියාව බලා පිටත් කොට යැවූහ.
පසුගිය සතියේදී මෙවැනිම ඉන්දීය ධීවරයින් 42 ක් කිසිදු දඩුවමක් ලබා නොදී ආපසු ඉන්දියාව බලා පිටත්කොට යවන ලද අතර ඊට උතුරේ ධීවර සංගම් වල විරෝධයද පල වී ඇත.
