ආසියා සත් සාමාජික රග්බි තරගාවලියේ දෙවැනි අදියර ලෙස ඊයේ දකුණු කොරියාවේ ඉන්චෙං නුවර දී අවසන් වූ දෙදින තරගාවලියෙන් පසු අතුරුදහන් වූ ශ්රී ලංකා කාන්තා රග්බි කණ්ඩායමේ නායිකා දුලානි පල්ලිකොන්දගේ සොයා දැඩි පොලිස් මෙහෙයුමක් ආරම්භ වී තිබේ.
කාන්තා කණ්ඩායමේ කළමනාකාරීනිය ඇයගේ අතුරුදහන්වීම සම්බන්ධව ඉන්චෙං පොලිසියට පැමිණිලි කිරීමත් සමග ඇය සොයා මෙම මෙහෙයුම ආරම්භ කර ඇතැයි දකුණු කොරියානු ආරංචි මාර්ග වාර්තා කළේය.
එරට ආරක්ෂක වැටලීම් සහ සීසීටීවී ඇතුළු ආරක්ෂක පද්ධතිය ඉතා ඉහළ මට්ටමක පවතින බැවින් කඩිනමින් ඇය සොයා ගැනීමට හැකිවනු ඇතැයි ද ඉන්චෙං පොලිසිය ශ්රී ලංකා කාන්තා රග්බි කණ්ඩායමේ කළමනාකාරිනිය ආචාර්ය සමන්තා නානායක්කාරට ප්රකාශ කර ඇතැයි වැඩිදුරටත් වාර්තා වේ.
ඊයේ දහවල් කාන්තා තරගාවලියේ හොංකොං කණ්ඩායම සමඟ පැවැති ශ්රී ලංකා කාන්තා කණ්ඩායමේ අවසන් තරගයෙන් පසු ශ්රී ලංකා ක්රීඩකයන්ගේ සහ පිලිපීන ක්රීඩකයන්ගේ තරගය නැරඹීමට සිය කණ්ඩායම සමඟ අසුන්ගෙන සිටි දුලානි ත්යාග ප්රදානය කිරීමෙන් පසු අතුරුදන් වී ඇති බව වාර්තා වේ.
ඇය ඊට පෙර මාධ්ය හමුවට ද එක්වී ඇත.
තරගාවලියෙන් පසු යළි හෝටලය කරා යෑමට බස් රථය අසලට පැමිණීමෙන් පසු දුලානි එහි නොමැති බව දැනගත් කණ්ඩායමේ කළමනාකාරිනිය ක්රීඩා මණ්ඩපයේ ශබ්ද විකාශන යන්ත්ර ආධාරයෙන් ඇයට සිංහල බසින් පණිවිඩ දෙකක් නිකුත් කළද, ඇය පැමිණ නැතැයිද, පසුව කණ්ඩායම් දෙක හෝටලය කරා පිටත් කොට පිරිමි කණ්ඩායමේ කළමනාකරු සමඟ දකුණු කොරියානු රග්බි සංගමයේ නිලධාරීන්ට මේ බව දන්වා ඇතැයි ද, අනතුරුව පොලිසිය සමඟ එක්ව දුලානි සොයා ගැනීමට උත්සාහ කර ඇතැයි ද වැඩිදුරටත් වාර්තා වේ.
ශ්රී ලංකා කාන්තා හා පිරිමි රග්බි කණ්ඩායම් අද රාත්රී දිවයිනට පැමිණීමට නියමිත අතර, ඊට පෙර දුලානි සොයා ගැනීමට දකුණු කොරියානු පොලිසිය දැඩි උත්සාහයක නිරතව සිටින බවට තොරතුරු වාර්තා වේ
