දිනසේන රතුගමගේ –
වවුනියාවේ අඩු ආදායම්ලාභීන් අතර බෙදා හැරීම සදහා ඉන්දියාවේ තමිල්නාඩු රජය විසින් 2022 වසරේදී නිකුත් කළ සහල් කිලෝ ග්රෑම් 2000 ක් පමණ මේ වන තුරුත් ගම්වැසියන් වෙත ලබා දී නොමැති බවට පෙත්සමක් ආසිකුලම ගම්මානයේ වැසියන් විසින් ඊයේ ( 2 ) වවුනියාව ප්රාදේශීය ලේකම් කාර්යාලය වෙත බාර දී තිබේ.
වවුනියාවේ සියළුම ගම්වැසියන්ට 2022 වසරේදී ඉන්දීය සහල් ලැබුණු අතර ආසිකුලම ඇතුළු ගම්මාන කීපයක වැසියන්ට පමණක් එම සහල් ආධාරය නොලැබුණි.
ගම්වාසීන් මේ පිළිබදව සොයා බැලීමකදී වවුනියාව ආසිකුලම මධුරාපුර ප්රදේශයේ ගබඩාවක සඟවා තිබියදී ඉන්දියානු සහල් කිලෝ 2000 ක් සොයා ගැනීමට හැකි වුණි.
ගම්වාසීන් මේ පිළිබදව වවුනියාව දිස්ත්රික් ලේකම් කාර්යාලයට පැමිණිලි කිරීමෙන් පසුව ඒ සම්බන්ධයෙන් පරීක්ෂණයක් ආරම්භ කර ඇත. ගම්වාසීන් පෙත්සමක් මගින් පවසන්නේ පරීක්ෂණය ආරම්භ වී මේ වන විට වසරකට වඩා වැඩි කලයක් ගත වී ඇතත් ආසිකුලම ගම්මානය ඇතුලු සහල් අහිමි වූ ගම්වැසියන්ට සාධාරණයක් ඉටු නොවුණු බවය.
ආසිකුලම ඇතුලු ගම්මාන වල වැසියන් කියා සිටින්නේ ගබඩාවේ කාලයක් තිබූ එම සහල් තොග මේ වන විට නරක් වී තිබීම නිසා එම සහල් ජනතාවට ලබා දුන්නද ඒවා ප්රයෝජනයට ගත නොහැකි බවයි.
මේ නිසා මෙම සහල් වංචාවට සම්බන්ධ නිලධාරීන්ට දැඩි දඩුවම් ලබා දී ඔවුන්ගේ වියදමින් ජනතාවට පාරිභෝජනයට ගත හැකි අලුත් සහල් තොගයක් ලබා දීමට පියවර ගන්නා ලෙස රජයේ නිලධාරීන්ගෙන් ගම්වැසියන් ඉල්ලීමක් කොට ඇත.
