ක්රිකට් පුදුමය කමිඳුදැයි සිතේ. මේ සන්සුන් යෞවනයා ක්රිකට් පිටියේ වාර්තා කණපිට හරවමිනි. ක්රීඩා කළේ ටෙස්ට් තරග අටකි. ඉනිම 13කි. ටෙස්ට් තරගවලට 08කි තැබූ වාර්තා ගණන 07කි. ඒ අතර අවුරුදු 147ක් පැරණි ටෙස්ට් ක්රිකට් ඉතිහාසයේ තැබූ ලෝක වාර්තා දෙකකි.
අද කමිඳු නොදැවී ලකුණු 182කි. අසහ උසට ගිය ශ්රී ලංකා පළමු ඉනිම ලකුණු 602ට කඩුළු 05කි. ඒ අතර ශතක තුනකි. අර්ධ ශතකයකි. කමිඳු සමග චන්දිමාල් ලකුණු 116ක්, කුසල් මෙන්ඩිස් නොදැවී ලකුණු 101ක් ලබාගෙනය. ඈන්ජලෝ මැතිව්ස් ලකුණු 86කට දැවී යන්නේ ශතකය දකමිනි. මෙවැනි අසිරිමත් ඉනිමක් සහිතව සිටින ශ්රී ලංකාව දෙස ලෝකය බලා ඉන්නේ අංක 5 පිතිකරු වූ ටෙස්ට් බිමේ කසකාර යෞවනයා දෙස විශාල බරක් තබමිනි.
අද ශතකයත් සමග ලෝක ටෙස්ට් ඉතිහාසයේ මුල් ඉනිමේ සිට අඩුම ටෙස්ට් ඉනිම සංඛ්යාවකින් ටෙස්ට් ලකුණු 1000 ඉක්මවා ගිය සිවු වැනියා කමිඳුය. ඔහුට කලින් එවර්ටන් වීක්ස් සහ හර්බට් සට්ක්ලිෆ් ටෙස්ට් ඉනිම 12කින් ටෙස්ට් ලකුණු 1000 ඉක්මවූයේය. සම මුල් තැනට අනතුරුව තෙවැනි තැන ගත්තේ ඩොන් බ්රැඩ්මන්ය. බ්රැඩ්මන් ටෙස්ට් ලකුණු 1000 ලැබීමට ඉනිම 13ක් වැය කළේය. කමිඳු අද සම කළේ බ්රැඩ්මන්ගේ වාර්තාවය.
අද කමිඳු නොදැවී රැස් කළ ලකුණු සංඛ්යාව ලකුණු 182කි. ඉනිම 13ක දී ඔහු ලකුණු 1004ක් ලබා තිබිණි. මින් පෙර ශ්රී ලංකාවේ වේගවත්ම ලකුණු 1000 ඉක්මවූ ක්රීඩකයින් තිදෙනෙක් සම තැන සිටියහ. එක්කෙනෙක් රෝයි ඩයස්ය. දෙවැනියා මයිකල් වැන්ඩවොට් ය. තුනවැනියා ධනංජය ද සිල්වාය. ඔවුන් තුන් දෙනාම ලකුණු දහසක් රැස් කරීමට ඉනිම 23ක් වැය කළහ. ඒ වාර්තා පැත්තකවත් නැත. කමිඳු ටෙස්ට් ලකුණු 1000 ඉක්මවන්නේ ඔවුන්ට වඩා ඉනිම 10ක් කලිනි.
තවමත් 25 හැවිරිදි වියේ පසුවන මේ සන්සුන් යෞවනයා ඊයේ ලෝක වාර්තාවක් තැබුවේය. ඒ තමන් මුහුණ දුන් මුල්ම ටෙස්ට් තරගයේ සිට අඛණ්ඩව ටෙස්ට් තරග අටකම ලකුණු 50කට වඩා රැස් කළ ක්රීඩකයා ලෙසය. ඔහුට පෙර මංගල ටෙස්ට් තරගයේ සිට අඛන්ඩව ටෙස්ට් තරග 7ක දී තරගයක අවම වශයෙන් එක් ඉනිමක දී ලකුණු 50කට වඩා රැස් කර ලෝක වාර්තාවට හිමිකම් කීවේ පකිස්ථාන ක්රීඩක ෂවුඩ් ෂකීල්ය. කමිඳු ඊයේ එම වාර්තාව බින්දේය. ඔහු තරග අටක දී අඛණ්ඩව ලකුණු 50කට වඩා වැඩිපුර ලබාගත් ලෝක ටෙස්ට් ඉතිහාසයේ මුල්ම ක්රීඩකයා විය.
කමිඳු මෙන්ඩිස් මේ වසරේදී තවත් වාර්තා රැසක් පිහිටුවීය
කමිඳු මේ වසරේ පිහිට වූ වාර්තා අතර වසර 147ක් පැරණි ජාත්යන්තර ටෙස්ට් ක්රිකට් ඉතිහාසයේ ශ්රේෂ්ඨ පිතිකරුවන් කිසිවෙකු මෙතෙක් පිහිටුවා නොතිබූ වාර්තාවක් විය. මේ වසරේ මාර්තු මාසයේදී පිහිටුවන ලද එම වාර්තාව වූයේ, 7 වන හෝ ඊට පහළින් පිටියට පිවිස ටෙස්ට් තරගයක ඉනිම දෙකේදී ම ශතක රැස් කළ පළමු පිතිකරුවා ලෙසය.
1937 වසරේදී 7 වන හෝ ඊට පහළ පිතිකරුවෙකු ලෙස ටෙස්ට් තරගයකදී රැස් කර තිබූ වැඩි ම ලකුණු සංඛ්යාව පසු කර යාමට කමිඳු මෙන්ඩිස්ට අවශ්යව තිබුණේ තවත් ලකුණු 5ක් පමණි. ඔහුට ලකුණු 5කින් අහිමි වන්නේ ඩොන් බ්රැඩ්මන්ගේ වාර්තාවය. 1937 වසරේදී එංගලන්තයට එරෙහිව 7 වන පිතිකරුවා ලෙස පිටියට පිවිසි ඩොනල්ඩ් බ්රැඩ්මන් ඉනිම දෙකේදී ලකුණු 270ක් රැස් කර තිබිණි. කමිඳු මෙන්ඩිස් ඉනිම දෙකේදී ලකුණු 266ක් රැස් කිරීමට සමත් විය.
සෙසු වාර්තා
කමිඳු මෙන්ඩිස්, ධනන්ජය ද සිල්වා සමග එක්ව තවත් වාර්තා කිහිපයකට දායක විය.
- ඉනිම දෙකේදී ම ශතක රැස් කළ ලොව තුන් වන පිතිකරු යුගලය (මීට පෙර 1974 වසරේදී ඔස්ට්රේලියාවේ ඉයන් චැපල් සහ ග්රෙග් චැපල් සොහොයුරන් නවසීලන්තයට එරෙහිව සහ 2014 වසරේදී පකිස්ථානයේ අසාර් අලි සහ මිස්බා උල් හක් ඔස්ට්රේලියාවට එරෙහිව ද මෙම දක්ෂතාව දක්වා තිබිණි.)
- ටෙස්ට් තරගයක ඉනිම දෙකේදී ම ලකුණු 150ක සබඳතාවක් ගොඩ නැගූ තුන් වන පිතිකරු යුගලය ඔවුන්ය. ධනංජය සහ කමිඳු – පළමු ඉනිම 202, දෙවන ඉනිම 177( පෝල් ගිබ් සහ එඩී පෙයින්ටර් – පළමු ඉනිම 184, දෙවන ඉනිම 168…. ජෝ බර්න්ස් සහ ඩේවිඩ් වෝර්නර් – පළමු ඉනිම 161, දෙවන ඉනිම 237)
- ටෙස්ට් තරගයක දෙවන ඉනිමේදී කඩුලු 6ක් බිඳ වැටීමෙන් පසු ශ්රී ලංකාව වෙනුවෙන් ගොඩ නැගුණු වැඩි ම ලකුණු සබඳතාව. (කමිඳු මෙන්ඩිස් සහ ධනන්ජය ද සිල්වා ලකුණු 292ක් රැස් කළ අතර ඊට පෙර එම වාර්තාව පැවතියේ ලකුණු 223ක් ලෙස ය.)
කවුද මේ කමිඳු දිලංක මෙන්ඩිස්…
කමිඳු දිලංක මෙන්ඩිස් හෙවත් කමිඳු මෙන්ඩිස් ගාල්ලේදී උපත ලැබුවේ, 1998 වසරේ සැප්තැම්බර් 30 වන දා ය. ඔහුගේ වයස තවමත් අවුරුදු 25කි.
ගාල්ල, රිච්මන්ඩ් විද්යාලයේ ආදි ශිෂ්යයෙකු වන අතර, ඔහු ක්රිකට් ක්රීඩාව ආරම්භ කළේ, එම විද්යාලයෙනි.
ශ්රී ලංකා වයස අවුරුදු 19න් පහළ ජාතික කණ්ඩායම නියෝජනය කළ ඔහු, වමත් පිතිකරුවෙකු වන අතර, දෑතින් ම දඟ පන්දු යැවිය හැකි සුවිශේෂී ක්රීඩකයෙකි.
ශ්රී ලංකා ජාතික කණ්ඩායමට අමතරව, ඔහු B-Love Kandy, ටැමිල් යූනියන්, බංග්ලාදේශයේ සිල්හෙට් ස්ට්රයිකර්ස් ඇතුළු කණ්ඩායම් කිහිපයක සාමාජිකයෙකි.
මේ වසරේ මාර්තු මාසයේ ජාත්යන්තර ක්රිකට් කවුන්සිලයේ දක්ෂතම ක්රිකට් ක්රීඩකයා ලෙස සම්මානයට පාත්ර වූයේ, කමිඳු මෙන්ඩිස් ය.
