දිනසේන රතුගමගේ
ඉන්දීය ධීවරයින් සතු අශ්ව බල පනහට අඩු ධීවර යාත්රාවලට සතියකට දින දෙකක් උතුරු මුහුදේ මසුන් මැරීම සඳහා අවසර ලබා දීමේ යෝජනාවක් සම්බන්ධයෙන් දෙරට අතර සාකච්ඡා ආරම්භ වී තිබේ
ඉන්දීය ධීවර රාජ්ය අමාත්ය එල් .මුරුගන් පසුගියදා යාපනයේ සංචාරය කිරීමෙන් පසුව මේ යෝජනාව ඉදිරිපත් වී ඇති අතර ජනාධිපතිවරයාගේ මී ළඟ ඉන්දීය සංචාරයේදී එම යෝජනාව තහවුරු කිරීමට නියමිතව තිබේ.
ඉන්දියාවේ සිට උතුරු මුහුදට අනවසරයෙන් මසුන් මැරීම සඳහා පැමිණෙන ටෝලර් වර්ගයේ යාත්රා අශ්ව බල 150 හා ඊට වඩා වැඩි ධාරිතාවයකින් යුක්ත වන අතර එවැනි යාත්රාවලට නව යෝජනාවට අනුව උතුරු මුහුදු සීමාවට පැමිණීමට අවසර ලබා නොදීමට තීරණය කොට තිබේ.
අශ්ව බල පනහට අඩු යාත්රා වලට සතියකට දෙවරක් උතුරු මුහුදට පැමිණීමට අවසර ලබා දෙන අතර ඒ සඳහා යම් මුදලක් ශ්රී ලංකා රජයට ගෙවීමට ඉන්දීය ධීවරයින්ට සිදු වන අන්දමට නව නීති සැකසීමට අදහස් කෙරෙයි.
නමුත් උතුරේ ධීවර සංගම් සඳහන් කරනු ලබන්නේ කවර නීති මාලාවක් යටතේ වුවද ඉන්දීය යාත්රාවලට උතුරු මුහුදට පැමිණීම සඳහා අවසර ලබා නොදිය යුතු බවයි.
