තමන් ග්රීන්ලන්තය බලහත්කාරයෙන් අත්පත් කර නොගන්නා නමුත්, එම දේපළ අමෙරිකාවට ලබා ගැනීම සඳහා වන ඉල්ලීම අත් නොහරින බව ඩොනල්ඩ් ට්රම්ප් අද (21) ප්රකාශ කළේය.
ඩාවෝස්හි පැවැති ලෝක ආර්ථික සමුළුවේදී අදහස් දක්වමින් ඔහු අනතුරු ඇඟවීමක් ද සහිතව ඩෙන්මාර්කයට කියා සිටියේ, මේ සම්බන්ධයෙන් තීරණයක් ගැනීමට ඩෙන්මාර්කයට තේරීමක් ඇති බවය.
මේ කතාව අතර ට්රම්ප් මෙසේ පැවසීය “මම බලය පාවිච්චි කරනවා යැයි මිනිසුන් සිතුවා, නමුත් මට එසේ කිරීමට අවශ්ය නැහැ,”කෙසේ වෙතත්, ඔහු මීට පෙර පනවන බවට තර්ජනය කළ වෙළඳ බදු (Tariffs) පිළිබඳව මෙහිදී සඳහන් කළේ නැත.
මේ සමගම ඔහු ඩෙන්මාර්කයට සිය කතාවේ දී අනතුරු ඇඟවීම කැපි පෙනුණි. දැනට ඩෙන්මාර්කයට අයත් ස්වාධීන පාලනයක් සහිත ග්රීන්ලන්තය අත්කරගැනීමේ දී ට්රම්ප් ප්රධාන වශයෙන්ම බලපෑම් එල්ල කරමින් සිටින්නේ ඩෙන්මාර්කයට ය. කතාවේ දී ට්රම්ප් ඩෙන්මාර්කයට මෙසේ පැවසුවේය.
“ඔබට ‘ඔව්’ කිව හැකියි, එවිට අපි එය අගය කරනවා. නැතහොත් ‘නැත’ කිව හැකියි, එවිට අපි එය මතක තබා ගන්නවා,”
මිලිටරි සහ ආරක්ෂක හේතු:
ග්රීන්ලන්තය අමෙරිකාවේ “ගෝල්ඩන් ඩෝම්” (Golden Dome) මිසයිල ආරක්ෂණ පද්ධතියට ඉතා වැදගත් බව ට්රම්ප් අවධාරණය කළේය. ඔහු ග්රීන්ලන්තය හැඳින්වූයේ ලෝක ආරක්ෂාව සඳහා අවශ්ය “හිම කැබැල්ලක්” ලෙසය.
ජාත්යන්තර ප්රතිචාර:
ට්රම්ප්ගේ ප්රකාශයට ප්රතිචාර දක්වමින් ඩෙන්මාර්ක විදේශ අමාත්ය ලාර්ස් ලොකේ රස්මුසන් පැවසුවේ ට්රම්ප් හමුදා බලය පාවිච්චි නොකරන බව පැවසීම යහපත් වුවත්, එමඟින් ගැටලුව විසඳෙන්නේ නැති බවය.
යුරෝපා සංගමය ද ටම්ප්ගේ හැසිරීමට විරෝධය දක්වා තිබේ. ට්රම්ප්ගේ මෙම තර්ජන හමුවේ යුරෝපා පාර්ලිමේන්තුව අමෙරිකාව සමඟ ඇති කර ගැනීමට නියමිත වෙළඳ ගිවිසුම් පිළිබඳ කටයුතු තාවකාලිකව අත්හිටුවා ඇත.
ට්රම්ප් සිය කතාවේදී බ්රිතාන්යය, ස්විට්සර්ලන්තය, ප්රංශය සහ කැනඩාව වැනි මිත්ර රටවල් ද දැඩි ලෙස විවේචනය කළේය. ස්වීඩනයේ නියෝජ්ය අගමැතිනිය පැවසුවේ යුරෝපය මෙයට වඩා ශක්තිමත් විය යුතු බවයි.
ට්රම්ප් සිය කතාව අතරතුර අවස්ථා හතරකදී ග්රීන්ලන්තය (Greenland) වෙනුවට වැරදීමකින් අයිස්ලන්තය (Iceland) යන නම භාවිතා කර තිබිණි. එමෙන්ම ඔහු මෑතකදී වෙනිසියුලාවේ නිකොලස් මදුරෝ බලයෙන් පහ කිරීමට ගත් උත්සාහය ගැන පවසමින් අමෙරිකානු හමුදා ශක්තිය පිළිබඳව උදම් ඇනුවේය.
