දිනසේන රතුගමගේ
ඉන්දීය හිටපු අග්රාමාත්ය රජීව් ගාන්ධි ඝාතනය කිරීමේ සිද්ධිය සම්බන්ධයෙන් වරදකරු වී ජීවිතාන්තය දක්වා සිරදඩුවම් නියම වී සිට පසුව අධිකරණයේ විශේෂ තීන්දුවක් මත නිදහස ලැබූ යාපනයේ තිල්ලයිම්බලම් සුදේන්ද්රරාජා ( ශාන්තන්ගේ ) දේහය අද (3) සවස යාපනයට රැගෙන ආවේය.
ඉන්දියාවේ සිට යාපනයේ සිය මව බැලීමට වසර 32 කට පසුව යාපනයට පැමිණීමේ සූදානමින් සිටියදී ශාන්තන් හදිසියේ රෝගී වී රෝහල් ගත කිරීමෙන් පසුව එහිදී මිය ගියේය.
ඔහුගේ දේහය ගුවනින් කොළඹට රැගෙන විත් එතැන් සිට රිය පෙරහැරකින් යාපනය දක්වා රැගෙන ඒමට ශාන්තන්ගේ අවමංගල කටයුතු සංවිධානය කළ සංවිධායකයෝ පියවර ගෙන තිබුණහ.
අතර මගදී ශාන්තන්ගේ දේහයට අවසන් ගෞරව දැක්වීමට විශාල පිරිසක් එක්ව සිටීමත් වවුනියාවේ සිට යාපනය දක්වා ස්ථාන කීපයකදීම දේහය මහජන ප්රදර්ශනය සඳහා තැබීමට සිදු වීමත් නිසා ශාන්තන්ගේ දේහය කොළඹ සිට යාපනයට රැගෙන යාමට දින දෙකක කාලයක් ගත විය.
යාපනය බස් නැවතුම් පලේදී ද මහජන ගෞරවය සඳහා ශාන්තන්ගේ දේහය පැය කීපයක් තබා තිබූ අතර පසුව දේහය ශාන්තන්ගේ නිවස පිහිටි යාපනයේ උඩුප්පිඩ්ඩි වෙත රැගෙන එනු ලැබීය.
අවසන් කටයුතු 4 දා පස්වරුවේ යාපනයේ එල්ලංගකුලම් සුසාන භූමියේදී සිදු කිරීමට නියමිතය.
