හැම දෙනාටම උත්තර තිබුන ද ව්යසනයට පත් වී ඇත්තේ ගොවි ජනතාව බවත් චන්ද්රිකා වැවෙන් ජලය නිදහස් කිරීම පමා වීම හේතුවෙන් ගොවීන්ට සිදුවී ඇත්තේ වන්දි දී පිරිමැසිය හැකි හානියක් නොවන බව කෘෂිකර්ම ඇමති මහින්ද අමරවීර කීවේය.
මේ වනවිට මහවැලියේ ඇස්තමේන්තු අනුව වගා හානිය සියයට 15ක් බවත් එය වැඩි විය හැකි බවත් පෙන්වා දෙන කෘෂිකර්ම ඇමතිවරයා වී ගොවිතැන පමණක් නොව, එළවළු වගාවට, කෙසෙල් වගාවට, උක් වගාවට සිදුවූ හානිය මේ තාක් ගණනය කිරීමටවත් නොහැකි වී ඇති බව පෙන්වා දුන්නේය.
ඇමතිවරයා ප්රකාශ කළේ දින 10කට පෙර මේ තත්ත්වය සම්බන්ධව පුරෝකථනයක් කර තමන් කැබිනට් මණ්ඩලයට ඉදිරිපත් කළ බවත් පමා වී හෝ මේ ආකාරයෙන් ජලය නිදහස් කිරීමට ගත් තීන්දුව අතිශයින්ම වැදගත් බවත්ය.
ඇමතිවරයා මෙසේ ද කීවේය.
“ මේ වෙලා තියෙන්නේ ගොවි ජනතාවට වන්දි දීල පිරිමහන්න පුලුවන් පාඩුවක් නෙමෙයි.
මේ හානිය සුලුවට සලකන්න බෑ. මේ හානිය තක්සේරු කරන්නත් අමාරුයි. ගොයම පීදෙන වෙලාවේ මේක වෙන්නේ .ගොයම තියෙයි. කරලත් තියෙයි. අස්වැන්න තියෙයි ද කියන දකියන ගැටලුව දැන් තියෙන්නේ. මම මේ කියන්නේ හම්බන්තොට වී වගා කරන කුඹුර දකිමින් එළියට බහින කෙනෙක් විදිහට.
වී වගාවට විතරක් නෙමෙයි, කෙසෙල්වලට එළවලුවලට උක්වලට සිදුවූ හානිය බරපතලයි. වෙච්ච දේවල් වෙලා ඉවරයි. පමා වෙලා හරි ගන්න පුලුවන් ක්රියාමාර්ගවලට ඇවිත් තියනවා. මීට දවස් 10කට කලින් මේ අවදානම කැබිනට් මණ්ඩලයට අපි ඉදිරිපත් කළා. අපි විවිධ ආකාරයට මැදිහත් වුනා. “
“මම නැවත කියන්නේ විශාල හානියක් සිද්ධ වෙනවා. දැන් වෙච්ච දේ වුනා. ඊයේ දිනේ හරි එය යම් තරමකට වළක්වා ගන්න අවස්ථාව ලැබීම ගැන සතුටු වෙනවා.”
“දේශපාලනය කුමක් වුනත් මීට පස්සේ මෙවැනි තත්ත්වයක් ඇති නොවීමේ වගකීම අප හැමටම තියනවා. පොදු ප්රතිපත්තියක් තියෙන්න ඕන.
ප්රතිපත්තිය අනුව එක පානීය ජලය නම් දෙවැනි තැන කෘෂිකර්මය නම් විදුලි උත්පාදනය අංක තුන නම් නැවත මේ පාර්ලිමේන්තුව සාකච්ඡා කරලා කොහොමද ජලය නිදහස් කරන්නේ කියලා තීරණයක් ගන්න ඕන. “
මේ සඳහා සාමුහිකව ක්රියාකිරීමේ අවශ්යතාවයක් තියනව. දැන් බැලැවම පේන දේ තමයි මේ ආයතන හරි ආකාරයට කටයුතු කරලා නෑ.
මේ සඳහා රටට වගකියන යම් අමාත්ය කමිටුවක් තිබිය යුතුයි. වාරිමාර්ග අමාත්යාංශය, කෘෂිකර්ම අමාත්යාංශය, මහවැලි අමාත්යාංශය, විදුලිබල අමාත්යාංශය සහ කාලගුණ විද්යා දෙපාර්තමේන්තුව එකට එකතුවෙලා ජලය බෙදාගන්න විදිහට අපි මේ සැලසුම කරමු.”
“හැම පැත්තටම උත්තර හැදිලා තියනවා. ඒත් හානිය වෙලා තියෙන්නේ ගොවියන්ට. කොහොමද ඒක පිරිමහන්නේ. ජනාධිපතිතුමා එකඟවුනා වන්දි ගෙවන්න. නැවත මෙවැනි තත්ත්වයක් ඇති නොවෙන්න පොදු ප්රතිපත්තියකට යමු.”
