සම්බුදු සසුන සුරක්ෂිත කරමින් ඉදිරියට ගෙන යාමට ආණ්ඩු ක්රම ව්යවස්ථාව අනුව රජය වෙත පැවරී ඇති වගකීම නිසි ලෙස ඉටු කිරීමේ දී මහා සංඝරත්නය සම්බන්ධීකරණය කිරීම වෙනුවෙන් ජනාධිපති රනිල් වික්රමසිංහගේ උපදෙස් පරිදි ජනාධිපති කාර්යාලයේ ස්ථාපිත කෙරුණු භික්ෂු සම්බන්ධීකරණ ඒකකය තෛන්රිකායික මහා සංඝරත්නයේ ප්රධානත්වයෙන් ජනාධිපති ලේකම් සමන් ඒකනායක ගේ සහභාගිත්වයෙන් අද (17) පෙරවරුවේ විවෘත කෙරිනි.
මහා සංඝරත්නයේ සෙත් පිරිත් සජ්ජායනා මධ්යයේ නව ඒකකය විවෘත කෙරිණි.
මෙහිදී විශේෂ අනුශාසනාවක් සිදු කළ මල්වතු මහා විහාර පාර්ශ්වයේ අනුනායක සාහිත්ය චක්රවර්ති ආචාර්ය අතිපූජ්ය නියංගොඩ විජිතසිරි අනුනායක හිමිපාණන් වහන්සේ සඳහන් කළේ රට මුහුණ දී තිබෙන ආර්ථික, සමාජයීය මෙන්ම සංස්කෘතික අභියෝග ජයග්රහණය කරමින් ශ්රී ලංකාව ආර්ථික වශයෙන් සවිබල ගැන්වීමට ජනාධිපතිතුමා ගෙන යන වැඩපිළිවෙළට මහා සංඝරත්නයේ ආශිර්වාදය නිරතුරුවම හිමි වන බවයි. මහා සංඝරත්නය සහ පාලන තන්ත්රය අතර සබඳතා ශකිත්මත් කිරීමට මෙම නව භික්ෂු මධ්යස්ථානය ඉවහල් වනු ඇති බව ද උන්වහන්සේ පෙන්වා දුන්හ.
අස්ගිරි මහා විහාර පාර්ශ්වයේ නියෝජ්ය ලේඛකාධිකාරී අතිපූජ්ය නාරංපනාවේ ආනන්ද නායක හිමිපාණන් වහන්සේ ද මෙහිදී විශේෂ අනුශාසනාවක් සිදු කරමින් සඳහන් කර සිටියේ ශාසනික වශයෙන් අර්බුද රැසක් නිර්මාණය වී තිබෙන යුගයක ඒ වෙනුවෙන් රාජ්ය මැදිහත්වීම අත්යාවශ කරුණක් බවයි. ඒ අනුව මෙම නව භික්ෂු මධ්යස්ථානය විවෘත කිරීම ඉතා කාලෝචිත පියවරක් බව පෙන්වා දුන් උන්වහන්සේ සම්බුද්ධ ශාසනයේ චිරස්ථිතිය උදෙසා ජනාධිපති රනිල් වික්රමසිංහ මහතා සිදු කරනු ලබන කැපවීම ප්රශංසාවට ලක් කළහ.
මෙහිදී වැඩිදුරටත් අදහස් දැක්වූ මල්වතු පාර්ශ්වයේ අනුනායක, ආචාර්ය අතිපූජ්ය නියංගොඩ විජිතසිරි අනුනායක හිමිපාණන් වහන්සේ මේසේ අනුශාසනා කළහ.
ජනාධිපති කාර්යාලය තුළ භික්ෂු සම්බන්ධීකරණ ඒකකය පිහිටුවීම ඉතා වටිනා අරමුණු ඇතිව සිදුකළ කාර්යයක් බව කිවයුතුයි. අප රටේ සම්බුද්ධ ශාසනය සම්බන්ධ ගැටලුවලට විසඳුම් සෙවීමේ දී වඩාත් කාර්යක්ෂමව සහ අර්ථවත්ව එම කටයුතු සිදු කිරීමට මෙම ඒකකය තුළින් හැකියාව ලැබෙනු ඇතැයි විශ්වාස කරනවා.
විහාරස්ථාන පවත්වාගෙන යෑම, පාරම්පරික ධර්ම විග්රහයන් ආරක්ෂා කර ගැනීම, වර්තමානයේ ඇතිව තිබෙන විවිධ අභියෝගවලට මුහුණ දීමේ හැකියාව ඇතුළු ගැටලු විසදා ගැනීමට මෙම ආයතනය ප්රයෝජනවත් වනවා ඇති. මෙමඟින් වටිනා ප්රතිඵල ලබා ගන්නවා මෙන්ම, ශාසනයේ උන්නතියට ඉවහල් වනු ඇතැයි විශ්වාස කරනවා.
රටක් වශයෙන් අප අද මුහුණ දී තිබෙන ආර්ථික, සමාජයීය මෙන්ම සංස්කෘතික අභියෝගය ජයග්රහණය කරමින් ශ්රී ලංකාව ආර්ථික වශයෙන් සවිබල ගැන්වීමට ජනාධිපති රනිල් වික්රමසිංහ මහතා ගෙන යන වැඩපිළිවෙළට මහා සංඝරත්නයේ ආශිර්වාදය නිරතුරුවම ලැබෙන බව ද මා මෙම අවස්ථාවේ සඳහන් කිරීමට කැමතියි.
අස්ගිරි මහා විහාර පාර්ශ්වයේ නියෝජ්ය ලේඛකාධිකාරී අතිපූජ්ය නාරංපනාවේ ආනන්ද හිමිපාණන් වහන්සේ, නාරාහේන්පිට අභයාරාමාධිපති කොළඹ විශ්වවිද්යාලයේ කුලපති අතිපූජ්ය මුරුත්තෙට්ටුවේ ආනන්ද නායක හිමිපාණන් වහන්සේ, කොළඹ කොටුව ශ්රී සම්බුද්ධාලෝක මහා විහාරාධිපති බෞද්ධ හා පාලි විශ්වවිද්යාලයේ හිටපු උප කුලපති මහාචාර්ය අතිපූජ්ය ඉත්තදෙමළියේ ඉන්දසර නාහිමිපාණන් වහන්සේ, කැලණිය විශ්වවිද්යාලයේ දර්ශන අධ්යයන අංශයේ ජ්යෙෂ්ඨ මහාචාර්ය ශාසනකීර්ති ශ්රී ධර්ම දර්ශන විශාරද අතිපූජ්ය කන්දේගොඩ විමලධම්ම අනුනාහිමිපාණන් වහන්සේ, ශ්යාමෝපාලිවංශික මහා නිකායේ ශ්රී රෝහණ පාර්ශ්වයේ අනුනායක ඉලංගංගොඩ පුරාණ විහාරාධිපති ආචාර්ය පූජ්ය ඕමාරේ කස්සප අනුනායකහිමිපාණන් වහන්සේ, බස්නාහිර පළාතේ ප්රධාන අධිකරණ සංඝනායක, කොළඹ විශ්වවිද්යාලයේ සිංහල අධ්යයන අංශයේ මහාචාර්ය ලුනාව බෝධිරාජාරාමාධිපති දර්ශනපති අතිපූජ්ය අගලකඩ සිරිසුමන හිමිපාණන් වහන්සේ ද මෙහිදී අදහස් දැක්වූහ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
මෙම නව භික්ෂු සම්බන්ධීකරණ ඒකකය විවෘත කිරීමෙන් පසු ඒ සඳහා සහභාගී වූ මහා සංඝරත්නය වෙනුවෙන් සංඝගත දක්ෂිණාවක් ජනාධිපති මාධ්ය අංශ පරිශ්රයේදී පැවැත්විණි.
