ජනාධිපතිවරයාගේ ධූර කාලය අවසන්වන දිනය පිළිබඳව ශ්රේෂ්ඨාධිකරණයේ අර්ථ නිරූපණයක් දෙන තුරු ජනාධිපතිවරණය පැවැත්වීමෙන් මැතිවරණ කොමිසම වළක්වාලන අතුරු නියෝගයක් නිකුත් කරන්නැයි ඉල්ලා ව්යවසායකයෙකු ඉදිරිපත් කර ඇති මූලික අයිතිවාසිකම් පෙත්සම පංච පුද්ගල විනිසුර මඩුල්ලක් හමුවේ එළඹෙන සඳුදා සලකා බැලිමට ශ්රේෂ්ඨාධිකරණය අද (04) තීරණය කර තිබේ.
අගවිනිසුරු ජයන්ත ජයසූරියගේ ප්රධානත්වයෙන් යුත් මෙම පංච පුද්ගල විනිසුරු මඩුල්ලේ සාමාජික විනිසුරුවන් වශයෙන් ශ්රේෂ්ඨාධිකරණ විනිසුරුවරුන්වන විජිත් මළල්ගොඩ, මුර්දු ප්රනාන්දු, ප්රිති පද්මන් සූරසේන සහ එස් තුරෙයිරාජා පත් කර ඇත.
මොරටුව ප්රදේශයේ පදිංචි ව්යවසායකයෙකු වූ සී.ඩී. ලෙනව විසින් මෙම පෙත්සම ඉදිරිපත් කර තිබිණි.
එහි වග උත්තරකරුවන් ලෙස මැතිවරණ කොමිසම, එහි සභාපතිවරයා ඇතුළු සාමාජිකයින් සහ නීතිපතිවරයා නම් කර ඇත.
පෙත්සම්කරු කියා සිටින්නේ ආණ්ඩුක්රම ව්යවස්ථාවේ 19 වන සංශෝධනය තුළින් ජනාධිපතිවරයාගේ ධුර කාලය සම්බන්ධයෙන් සිදුකළ සංශෝධනය හේතුවෙන් ජනාධිපතිවරයාගේ දුර කාලය අවසන් වන දිනවකවානු සම්බන්ධයෙන් අපැහැදිලිතාවයක් නිර්මාණය වී තිබෙන බවයි.
එබැවින් 19වැනි ආණඩුක්රම ව්යවස්ථාවේ ජනාධිපතිවරයාගේ ධුර කාලය කවරක් ද යන්න පිළිබඳව ශ්රේෂ්ඨාධිකරණය විසින් අර්තකථනය කළ යුතු බවත් අර්ථ නිරූපණයක් ලබාගැනිමකින් තොරව ජනාධිපතිවරණය පැවැත්වීමෙන් ජනතාවගේ මූලික අයිතිවාසිකම් උල්ලංඝනයවන බවත් පෙත්සම් කාර මොරටු පුරවැසියා පවසයි.
ජනාධිපතිවරයාගේ ධූර කාලය අවසන්වන දිනය සම්බන්ධයෙන් පැහැදිලි අර්තකථනයක් දෙන තෙක් දැනට ප්රකාශ කර ඇති ජනාධිපතිවරණය පැවැත්වීමෙන් මැතිවරණ කොමිසම වළක්වාලන අතුරු නියෝගයක් නිකුත් කරන්නැයි ද පෙත්සම්කරු මෙම මුලික අයිතිවාසිකම් පෙත්සමක් අධිකරණයෙන් ඉල්ලා තිබේ.
