ජනශක්ති සමූහ ව්යාපාරයේ සභාපති දිනේෂ් ශාෆ්ටර් පැහැරගෙන බොරැල්ල සුසාන භූමිය වෙතට රැගෙනගොස් ඝාතනය කිරීමට උත්සාහ දරා ඇතැයි බොරැල්ල පොලීසිය පවසයි.
දෑත් බැඳ ගෙලට වරයක් දමා සිරකර සිටිය දී අද (15) සවස් වරුවේ හමුවී ඇති සභාපතිවරයා මේ වනවිට කොළඹ ජාතික රෝහලේ දැඩි සත්කාර ඒකකයේ ප්රතිකාර ගනිමින් සිටින බවත් ඔහුගෙන් කිසිම ප්රකාශයක් සටහන් කරගැනීමට නොහැකි මට්ටමක සිටින බවත් පොලිසිය පවසයි.
මෙම ඝාතන තැත සම්බන්ධව වැඩිදුර පරීක්ෂණ අපරාධ පරීක්ෂණ දෙපාර්තමේන්තුව වෙත භාර දී තිබේ.
දිනේශ් ෂාෆ්ටර් අද (15) දහවල් කුරුඳුවත්ත මල්පාර ප්රදේශයේ පිහිටි සිය නිවසින් පිටත්ව ගොස් ඇත්තේ ඔහුට රුපියල් බිලියන 1.43ක මූල්ය වංචාවක් සිදුකළ ප්රකට ක්රිකට් විස්තර විචාරකයෙක් හමුවීමට යන බව සිය සිය බිරියට පවසමින් බව වාර්තා වේ.
මෙම තැනැත්තා සිදුකළ මූල්ය වංචා පිළිබඳ දිනේෂ් ෂාෆ්ටර් අපරාධ පරීක්ෂණ දෙපාර්තමේන්තුව වෙත පැමිණිලි 03ක් ගොනුකර තිබිණි. මේ වංචාව සම්බන්ධයෙන් චුදිත පුද්ගලයා පසුගිය වසරේ පෙබරවාරි මස 11 වැනිදා රක්ෂිත බන්ධනාගාරගත කර තිබිණි.
කෙසේ වෙතත් දිනේශ් ෂාෆ්ටර් පිටත් වී ගොස් මද වේලාවකින් ඔහුගේ බිරිය ඔහුට දුරකථන ඇමතුමක් ලබාගෙන තිබේ. එහෙත් ඔහුගේ දුරකථනය ක්රියාවිරහිතව වී තිබී ඇත.
දුරකථනය හරහා ලැබී ඇති සංඥා අනුව ඔහුගේ දුරකථනය බොරැල්ල සුසාන භූමිය අසල තිබෙන බවට බිරිඳ අනාවරණය කරගෙන තිබේ.
ඒ පිළිබඳව සැක සිතූ සභාපතිවරයාගේ බිරිඳ, සමාගමේ විධායක නිලධාරියකුට ඒ බව පවසා බොරැල්ල සුසාන භූමිය වෙත එම නිලධාරියාව එවා ඇත.
පොලිසිය පවසන්නේ මෙම විධායක නිලධාරියා පැමිණ කළ සොයා බැලීමේදී, සභාපතිවරයා පැමිණි මෝටර් රථයේ රියදුරු අසුන මත ඔහුගේ අත්දෙක ගැට ගසා ගෙලට වයරයක් දමා ඇති අයුරු දැක ඇති බවය. එමෙන්ම මෙම මෝටර් රථය අසල සිට නාඳුනන පුද්ගලයකු පිටත් වන අයුරු සුසාන භූමියේ සිටි කම්කරු සේවකයෙකු දැක තිබූ බවද පොලීසිය කියයි.
විධායක නිලධාරියා සුසාන භූමියේ කම්කරු සේවකයකුගේ ද සහාය ඇතිව බැඳ දමා සිටි සභාපතිවරයාගේ අත් දෙකේ රැහැන් කපා ගෙලට දමා තිබූ වයර් ඉවත්කර ඔහුව කොළඹ ජාතික රෝහල වෙත ඇතුළත් කර තිබේ. ඔහු මේ වනවිට කොළඹ ජාතික රෝහලේ දැඩි සත්කාර ඒකකයේ ප්රතිකාර ලබයි.
