කොළඹ දිසාව භාර ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන්ගේ සහ කොටුව පොලිස් ස්ථානාධිපති ප්රධාන පොලිස් පරීක්ෂක සාගර ලියනගේ ගේ ජංගම දුරකථන රජයේ රස පරීක්ෂකවරයාගේ දෙපාර්තමේන්තුව වෙත ඉදිරිපත්කොට 2022.7.9 වැනි දින එකී දෙපාර්ශ්වය අතර ඇතිවූ දුරකථන සංවාද පටිගතවීම් පිළිබඳ වාර්තාවක් කැඳවන ලෙස කොටුව මහෙස්ත්රාත් තිලිණ ගමගේ ඊයේ (26 )දා කොළඹ මධ්යම කොට්ඨාස විමර්ශන ඒකකයට නියෝග කළේය.
අරගලකරුවන් විසින් 2022 ජූලි 9 වැනිදා ජනාධිපති මන්දිරයේ තිබී සොයාගත් රුපියල් එක්කෝටි අසූලක්ෂ පනස් දහසක මුදල කොටුව පොලිසියට භාරදීමෙන් අනතුරුව එම මුදල් වර්තමාන රජයේ මහජන ආරක්ෂාව පිළිබඳ අමාත්ය ටිරාන් අලස් වෙත භාරදෙන ලෙසට දේශබන්දු තෙන්නකෝන් විසින් දුරකථන මාර්ගයෙන් කර ඇතැයි කියන නියෝගයට අදාළව සිදුකරන විමර්ශන සඳහා එකී සංවාද අවශ්ය බව පවසමින් විමර්ශන නිලධාරීන් කළ ඉල්ලීමක් සලකා බැලූ මහෙස්ත්රාත්වරයා එම නියෝගය කළේය.
දේශබන්දු තෙන්නකෝන්ගේ එම නියෝගයට අදාල පොලිස් වාර්තා සටහන් සියල්ල කොටුව පොලිසියේ ස්ථානාධිපති සාගර ලියනගේ විසින් නියමිත පරිදි සටහන් කර ඒ සම්බන්ධව පොලිස්පති කාර්යාලයත් දැනුම්වත් කර තිබිණි.
මේ සම්බන්ධව කෙරෙන විමර්ශන අවශ්යතාවය මතුවන්නේ ජනාධිපති මන්දිරයෙන් ලැබුණු මුදල් ගණන් කර නියමිත කටඋත්තර ලබා දී පොලිසිය වෙත භාර දුන් අරගලකරුවන් අත්අඩංගුවට ගෙන ඔවුන් බන්ධනාගාරගත කරන්නට උසාවියට ඉදිරිපත් කර ඇති අවස්ථාවේදීත් පොලිසිය භාරයේ ඇති මුදල් අධිකරණයට ඉදිරිපත් නොකිරීම සම්බන්ධව කොටුව මහේස්ත්රාත් තිලිණ ගමගේ විසින් කළ ප්රශ්න කිරීම්වලින් අනතුරුවය.
එම විමර්ශන කටයුතුවල දී පොලිස් විශේෂ විමර්ශන අංශයේ අධ්යක්ෂ ජ්යෙෂ්ඨ පොලිස් අධිකාරී ඩී.එස් වික්රමසිංහ විසින් අරගලකරුවන් විසින් මුදල් භාර දුන් දිනයේ දේශබන්දු තෙන්නකෝන් සහ සාගර ලියනගේ අතර ඇති වූ දුරකථන සංවාදය පිළිබඳ තොරතුරු සහ සටහන් පොලිස් ලේඛනවල ලියැවී ඇති බවට උසාවියට කරුණු වාර්තා කර තිබිණි.
කෙසේ වෙතත් ඊයේ පොලිස් විශේෂ විමර්ශන ඒකකය උසාවිය හමුවේ කරුණු දක්වමින් කීවේ අපරාධ පරීක්ෂණ දෙපාර්තමේන්තුවේ වෝහාරික පරිගණක අංශය විසින් කරන ලද පරීක්ෂණ අනුව 2022.7.09 වැනි දින රාත්රි 9:17ට ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් විසින් කොටුව පොලිස් ස්ථානාධිපතිවරයාට දුරකථන ඇමතුමක් ලබාදී ඇති බවතහවුරු වී ඇති නමුත් එම දුරකථන සංවාදයේ දෙබස් පටිගතවී නොමැති බවය.
කෙසේ නමුත් ඊට පසුදින එනම් 2022.7.10 වැනිදා දේශබන්දු තෙන්නකෝන් විසින් කොටුව පොලිස් ස්ථානාධිපතිවරයාට නැවත දුරකථන ඇමතුමක් ලබාදී එකී මුදල පිළිබඳව ගත් පියවර කුමක් දැයි කොටුව ස්ථානාධිපතිවරයා ගෙන් දුරකථනයෙන් විමසන හඬපට පටිගතවී ඇතැයි ද විමර්ශන නිලධාරීහු එහිදී අධිකරණයට පැවසූහ.
අධිකරණයට පෙනී ගිය විශේෂ කාරණය වූයේ ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් විසින් එම මුදල් මහජන ආරක්ෂාව පිළිබඳ අමාත්ය ටිරාන් අලස්ගේ නිවසට ගෙන ගොස් දෙන ලෙසට කොටුව පොලිසියේ ස්ථානාධිපතිවරයා වෙත කළ බව කියන නියෝගයට අදාල හඬ පට පමණක් පටිගත වී නැති බවය.
දේශබන්දු තෙන්නකෝන් කොටුව පොලිස් ස්ථානාධිපතිවරයාට දුරකථන ඇමැතුම් ලබාදී එකී මුදල් සම්බන්ධයෙන් උපදෙස් ලබාදුන් බව සනාථ කිරීමට ප්රමාණවත් සාක්ෂි නොවන්නේ දැයි විමසූ මහෙස්ත්රාත් තිලිණ ගමගේ කොටුව පොලිස් ස්ථානාධිපති සාගර ලියනගේ ගේ සහ බස්නාහිර පළාත් ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන්ගේ ජංගම දුරකථන රජයේ රස පරීක්ෂකවරයාගේ දෙපාර්තමේන්තුව වෙත ඉදිරිපත්කොට 2022.7.9 වැනි දින එකී දෙපාර්ශ්වය අතර ඇතිවූ දුරකථන සංවාද පටිගතවීම් පිළිබඳ වාර්තාවක් කැඳවන ලෙස නියෝගය කළේය.
එම නඩුව සැප්තැම්බර් 9 වැනිදා යළි කැඳවීමට ද මහෙස්ත්රාත්වරයා වැඩිදුරටත් නියෝග කළේය.
