මනම්පිටිය නිමල් ජයරත්න –
ජනාධිපති අනුර කුමාර දිසානායකගේ ප්රධානත්වයෙන් පසුගියදා ජනාධිපති ලේකම් කාර්යාලයේදී පැවැති සාකච්ඡාවේදී ගනු ලැබූ තීරණවලට සහ ලබාදුන් උපදෙස් පරිදි, පාරිභෝගික කටයුතු පිළිබඳ අධිකාරියේ නිලධාරී පිරිසක් අද 08 වෙනිදා පෙරවරුවේදී පොළොන්නරුව දිස්ත්රික්කයේ ප්රධාන පෙළේ වී සහ සහල් නිෂ්පාදන කරන ව්යාපාරික ස්ථාන පරීක්ෂණයට ලක් කළහ.
2003 අංක 09 දරන පාරිභෝගික කටයුතු පිළිබඳ අධිකාරි පනතේ බලතල ප්රකාරව පාරිභෝගික කටයුතු පිළිබඳ අධිකාරියේ අධ්යක්ෂක ජෙනරාල් වරයාගේ ලිඛිත නියෝග අනුව පොළොන්නරුව දිස්ත්රික්කයේ වී ගබඩා සහ සහල් මෝල් පරීක්ෂා කොට ඔවුන් සතුව පවතින වී තොග සම්බන්ධව සහ දිනපතා වෙළඳපොළට නිකුත් කරනු ලබන සහල් ප්රමාණයන් පිළිබඳව තොරතුරු ලබාගැනීම මෙහිදී සිදුකළ බව පාරිභෝගික කටයුතු පිළිබඳ අධිකාරියේ පොළොන්නරුව දිස්ත්රික් ප්රධාන නිලධාරී එච්.ජී.සී.සී.කුමාර ප්රකාශ කළේය.
එම පරීක්ෂාව සඳහා කුරුණෑගල, අනුරාධපුරය, මාතලේ යන දිස්ත්රික්ක වලින් නිලධාරීන් දහතුනකින් යුත් කණ්ඩායමක් වී සහල් මෝල් පරීක්ෂාවට සහභාගි වූ බව ඔහු පැවසුවේය.
දිස්ත්රික්කයේ ප්රධාන සහල් සැපයුම්කරුවන්ගේ සහල් නිෂ්පාදන ආයතන වලට පාරිභෝගික කටයුතු පිළිබඳ අධිකාරියේ නිලධාරීන් දෙදෙනා බැගින් යෙදවීමට කටයුතු කළ බව පාරිභෝගික කටයුතු පිළිබඳ අධිකාරියේ පොළොන්නරුව දිස්ත්රික් ප්රධාන නිලධාරී එච්.ජී.සී.සී.කුමාර වැඩිදුරටත් ප්රකාශ කළේය.
මේ අනුව දිස්ත්රික්කයේ ප්රධාන හාල් සැපයුම් කරුවන්වන අරලිය සහල් නිෂ්පාදන ආයතනය, නිව්රත්න, නිපුණ ලත් සහල් , මේනක සහල් , හිරු සහල් නිෂ්පාදන ආයතනය, ජයවික්රම, වී හේන සහල් නිෂ්පාදන ආයතනයන් නිරීක්ෂණය කිරීමට නිලධාරීන් යෙදවු බව හෙතෙම වැඩිදුරටත් සඳහන් කළේය.
