පරාජය වු පක්ෂ සහ කුඩා කණ්ඩායම් සමග සන්ධානගතව සභාවල බලය පිහිටුවීමේ කිසිම අදහසක් ජාතික ජන බලවේගයට නැති බව ජනතා විමුක්ති පෙරමුණේ ප්රධාන ලේකම් ටිල්වින් සිල්වා අද (07) පැවසුවේය.
අද පැවති විශේෂ මාධ්ය හමුවක දී මාධ්යවේදියෙක් නැගූ පැනයකට පිළිතුරු දෙමින් ඔහු මේ බව සනාථ කළේය.
ජාතික ජන බලවේගය පක්ෂයක් ලෙස වැඩිම ආසන සංඛ්යාවක් ලබා ගත් සෑම සභාවකම බලය පිහිටුවීමට කටයුතු කරන්නේ තනි තනිව තරග වැදුන හෝ ස්වාධීන කණ්ඩායම් ලෙස තරග වැදුන අපේක්ෂකයින් සමග සාකච්ඡා කර බව කී ටිල්වින් සිල්වා ඡන්ද ප්රතිඵල බලා ඉලක්කම් එකතු කොට වින්දනයක් ලබන අයට කිව යුත්තේ යථාර්ථය ඊට වඩා වෙනස් බවයැයි කීවේය..
ප්රශ්නය: සමහර තැන්වල 50%ක් වත් ඡන්ද නැති බව දකින්න ලැබුණා. ඔබලාට විපක්ෂයේ සහයෝගය ලබා ගන්න හැකියාවන් ලැබේවිද?
පිළිතුර: සභාවක වැඩි ඡන්ද ලබාගත් පක්ෂයට තමයි සභාව පිහිටුවීමේ සදාචාරාත්මක බලය ලැබෙන්නේ. සභාවක් පිහිටුවිය යුත්තේ දිනන ලද අය එකතු වෙලා. අපි සභා පිහිටුවීමේදී තනි තනිවම ඉදිරිපත් වූ අයත්, ස්වාධීනව ආව අයත් ඉන්නවා. ඒ අය අපට උදව් කරන්න කැමති නම්, අපට පුළුවන් එයාලට උදව් කරන්න. අපි ජනතාව දුන් වරම අනුව සභාව පිහිටුවනවා.
ජනතාව ප්රතික්ෂේප කළ කුඩා කණ්ඩායම් එක්ක එකතු වී සභා පිහිටුවීම සාර්ථක වේවිද කියන්න අපහසුයි. ජනතාව ප්රතික්ෂේප කළ පක්ෂ සමග කිසිසේත්ම එකතු වෙන්නේ නැහැ.
සභාවක වැඩිම ඡන්ද සංඛ්යාව ලබාගත් අයට තමයි, සභාව පිහිටුවන්න කියා ආරාධනා කරන්නේ. අනෙක් අයට සිදුවෙන්නේ, සභාවෙදි ඊට එරෙහිව ක්රියා මාර්ග ගන්න. ඒ අනුව තමයි කටයුතු කරන්න වෙන්නේ.
ප්රශ්නය: අයවැයේදි ප්රශ්නයක් වුවහොත්?
පිළිතුරු: එසේ වෙන්න හෝ නොවෙන්න පුළුවන්. කොහොමත් සභාපතිවරයාට, සභාව පවත්වාගෙන යාමට විශේෂ බලයක් තිබෙනවා. තීරක ඡන්දයක් සභාපතිවරයාට තිබෙනවා. අපි හොඳ අයවැයක් ඉදිරිපත් කළොත් ඒකට විරුද්ධ වෙන්න කිසිවෙකුට පුළුවන්ද කියන කරුණ තිබෙනවා.
අපි මහජන මුදල් නාස්ති කරන්නේ නැති නම්, සොරකම් කරන්නේ නැති නම්, කොමිස්, කොන්ත්රාත් ගහන්නේ නැතිනම්, බිම හදන හොඳ වැඩපිළිවෙළකට කිසිවෙකුට විරුද්ධ වෙන්න හැකියාවක් නැහැ.
ඡන්ද ප්රතිඵල බලලා, ඉලක්කම් එකතු කොට සතුටු වෙන්න හදන අයට, අපි කියනවා යථාර්ථය ඊට වඩා වෙනස්. අපි සභා පිහිටුවලා බලමු.
කවුරු හෝ පුද්ගලයෙකුට හිතුනොත් තමන් ඉන්න තැනට වඩා මෙතන හොඳයි, එයට උදව් කරනවා කියලා. ඒකට කිසිවෙකුටත් බාධාවක් නැහැ.
අපි පක්ෂත් එක්ක එකතු වෙලා, සන්ධාන ගහලා සභා පිහිටුවන්න කිසිම අදහසක් නැහැ. ඒ පක්ෂ පැරදුනු හා ප්රතික්ෂේප වූ පක්ෂ. ඒ නිසා ඒ පක්ෂත් සමග එකතු වීමට අවශ්ය නැහැ.
