පාර්ලිමේන්තු මන්ත්රී චාමර සම්පත් දසනායක ලබා දී ඇති ඇප අවලංගු කර ඔහු රක්ෂිත බන්ධනාගාරගත කරන ලෙස අල්ලස් කොමිසම කළ ඉල්ලීම කොළඹ මහේස්ත්රාත් අධිකරණය අද (16) ප්රතික්ෂේප කළේය.
ඌව පළාත් සභාවේ ප්රධාන අමාත්යවරයා ලෙස කටයුතු කළ කාලය තුළ රජයට රුපියල් බිලියන 1.76 කට වඩා පාඩුවක් සිදු කළ බවට එල්ල වන චෝදනා සම්බන්ධයෙන් නඩු කටයුතු නැවත ආරම්භ වීමත් සමඟ චාමර සම්පත් දසනායක අද (16) අධිකරණයට ඉදිරිපත් කරන ලදී.
අධිකරණය හමුවේ පෙනී සිටි අල්ලස් කොමිසම නියෝජනය කරන විමර්ශන නිලධාරියා ප්රකාශ කළේ හිටපු ජනාධිපති රනිල් වික්රමසිංහ චාමර සම්පත් මහතාට සහාය දක්වමින් ප්රකාශයක් කළේ මන්ත්රීවරයාගේ බිරිඳගේ ඉල්ලීමකට අනුව පමණක් බවත්, එම ප්රකාශය පූර්ණ අසත්යයක් බවත්ය. මෙවැනි තත්ත්වයන් නිසා විමර්ශනයට බාධා සිදුවන බැවින් චාමර සම්පත් දසනායකගේ ඇප අවලංගු කර ඔහුව රක්ෂිත බන්ධනාගාරගත කරන ලෙස අධිකරණයෙන් ඉල්ලා සිටියේය.
අධිකරණ තීන්දුව ප්රකාශයට පත් කරමින් කොළඹ ප්රධාන මහේස්ත්රාත් තනුජා ලක්මාලි ප්රකාශ කළේ අල්ලස් කොමිසම විසින් ඉදිරිපත් කරන ලද කරුණු මඟින් සැකකරුගේ ඇප අවලංගු කිරීමට ප්රමාණවත් සාක්ෂි අනාවරණය නොවන බැවින් කොමිසමේ ඉල්ලීම ප්රතික්ෂේප කරන බවයි.
