අදියර තුනකින් සම්පූර්ණ කිරීමට සැලසුම් කර තිබූ ගුරු වැටුප් විෂමතාවය එක්වර ඉවත් කිරීමට අග්රමාත්යවරයාගේ ප්රධානත්වයෙන් අද පැවති සාකච්ඡාවේ දී එකඟතාවයට පලවිය.
ගුරු වැටුප් විෂමතා ඉවත් කිරීම සඳහා අයවැයෙන් බිලියන 30ක් වෙන් කරන බවත්, ඉතිහසයේ පළමු වතාවට අධ්යාපනය සඳහා සමස්ත අයවැයෙන් 6% ඉක්මවන ප්රතිපාදන වෙන්වන බවත් මුදල් ඇමති බැසිල් රාජපක්ෂ පැවසීය.
මෙවර අයවැයේ සම්පූර්ණ වියදමින් 7.51%ක් අධ්යාපනය සඳහා වෙන් කරන බව මුදල් අමාත්යවරයා කීවේය.
ගුරු විදුහල්පති වැටුප් විෂමතා ඉවත් කිරීම ඇතුළු ඉල්ලීම් කිහිපයක් මුල් කරගනිමින් ගුරු විදුහල්පතිවරුන් ඔන්ලයින් ඉගැන්වීම් කටයුතුවලින් ඉවත් වී මාස තුනක කාලයක් වෘත්තීය ක්රියා මාර්ගයක නියැලී සිටියේය.
ගැටලුවට විසඳුම් යෝජනා කිරීම සඳහා අමාත්ය අනුකමිටුවක් ද පත් කෙරිණි. අගමැතිවරයා සහ ගුරු සහ විදුහල්පති වෘත්තීය සමිති නායකයින් අතර පසුගිය ජූලි මස 27 දා සාකච්ඡාවක් ද පැවැත්විනි.
එකඟතාවයකින් අවසන් නොවූ එම සාකච්ඡාවෙන් පසු අද (10) අග්රාමාත්ය මහින්ද රාජපක්ෂ, මුදල් අමාත්ය බැසිල් රාජපක්ෂ, අධ්යාපන ඇමති දිනේෂ් ගුණවර්ධන, ඩලස් අලහප්පෙරුම, මහින්ද අමරවීර, උදය ගම්මන්පිල ඇතුළු අමාත්ය පිරිසක් ගුරු සංගම් නියෝජිතයන් පාර්ලිමේන්තු පරිශ්රයේ දී විශේෂ සාකච්ඡාවක් පැවැත්වූයේය.
එහි දී ගුරු විදුහල්පති වැටුප් විෂමතා ඉවත් කිරීම සඳහා පත් කළ අමාත්ය මණ්ඩල අනු කමිටුවෙන් යෝජනා කළ වාර්තාවේ වැටුප් වර්ධක එක් අදියරකින් ලබා දීමට එකඟත්වය පල විය.
වැටුප් වර්ධක ලැබෙන්නේ මෙහෙමයි!
ඒ අනුව පළමු පන්තියේ ගුරුවරයෙකුගේ වැටුප රුපියල් 11820කින්
2.1 පන්තියේ ගුරුවරයෙකුගේ වැටුප රුපියල් 8250කින්
2.2 පන්තියේ ගුරුවරයකුගේ වැටුප රුපිලය්න 6535කින්
3.1 පන්තියේ ගුරුවරයෙකුගේ වැටුප රුපියල් 5870කින්
3.2 පන්තියේ ගුරුවරයෙකුගේ වැටුප රුපියල් 3750කින්
පළමු පන්තියේ විදුහල්පතිවරයෙකුගේ වැටුප 12 020කින්
දෙවන පන්තියේ විදුහල්පතිවරයෙකුගේ වැටුප රුපියල් 8645කින්
තුන්වන පන්තියේ විදුහල්පතිවරයෙකුගේ වැටුප රුපියල් 6895කින් වැඩි කිරීමට නියමිතය.
