රටේ ප්රධානම ජාතික ව්යාපෘතියක් ලෙස ජනාධිපතිවරයා විසින් හඳුන්වා දුන් ක්ලීන් ශ්රී ලංකා ව්යාපාරය යටතේ අනතුරු අවම කිරීම සඳහා වසර මුල ක්රියාත්මක වූ වැඩපිළිවෙළේ ඉලක්ක ප්රතිඵලයට සපුරා වෙනස් ප්රතිඵලයක් අත් කර දෙමින් මේ වසරේ මැයි මස 23 වැනිදා වනවිට මාරක අනතුරු දල වශයෙන් සියයට 7කින් වැඩි වී ඇති බවත්, මාරක අනතුරුවලින් සිදුවූ මරණ සංඛ්යාව සියයට 9කින් වැඩි වී ඇති බවත් පොලිස් රථවාහන අංශයේ සංඛ්යා දත්ත අනාවරණය කරයි.
මෙම වසරේ ජනවාරි 01 වැනිදා සිට මැයි 23 වැනිදා දක්වා කාලය තුළ මාරක රිය අනතුරු 986ක් සිදුව තිබිණි, එම අනතුරුවලින් මියගොස් ඇති ගණන 1051ක් බව රථවාහන පොලිස් මූලස්ථාන තොරතුරු සඳහන් කරයි.
2024 වසරේ මෙම කාලය තුළ සිදුව ඇති මාරක රිය අනතුරු ගණන 924කි. එම අනතුරුවලින් මියගොස් ඇති ගණන 965කි.
ඒ අනුව 2024 වසරේ සිදුවූ රිය අනතුරුවලට වඩා 2025 වසරේ මේ කාලය තුළ මාරක රිය අනතුරු 62ක වැඩි වීමක් ද මරණ 86කින් වැඩිවීමක් ද වාර්තා වී තිබේ.
මෙම වසරේ මාරක රිය අනතුරු ප්රමාණාත්මකව අඩු කිරීමට පොලීසිය වසර ආරම්භයේදීම වැඩසටහනක් දියත් කරනු ලැබුව ද එම සියලු වැඩසටහන් හුදු ප්රචාරක ව්යාපෘති වූවා මිස ප්රශ්නයේ ගැඹුර සහ අර්ථය හඳුනාගෙන දියත් කළ ඒවා නොවන බවට විවේචන පැන නැගිනි.
එමෙන්ම වැරදි කරන වැරදි කරන රියැදුරන් සම්බන්ධයෙන් ඡායාරූප සහ වීඩියෝ යොමු කිරීමට දුරකතන ඇප් එකක්ද මහජනතාවට හඳුන්වා දෙනු ලැබුවත් එම ක්රියාවලිය ද සක්රීයව සමාජය තුළට රැගෙන ගොස් බලගැන්වීමට රජය අපොහොසත් විය.
මේ සම්බන්ධව අදහස් දක්වමින් අද රූපවාහිනී වැඩසටහනකට එක් වුන පොලිස් මාධ්ය ප්රකාශක ජ්යෙෂ්ඨ පොලිස් අධිකාරී බුද්ධික මනතුංග පැවසුවේ පොලිසිය පාරට බැස මෙහෙයුම් වැඩි කර ඇති නමුත් මිනිස්සුන්ගේ ආකල්පමය වෙනසක් අති නොකර මේ රිය අනතුරු වළක්වා ගත නොහැකි බවය.
“ගිය වසරට සාපකේෂව මේ වසරේ දී බීමත් රියදුරන් අත් අඩංගුවට ගැනීම තුන් ගුණයකින් වැඩිවී තිබෙනවා. ඇලකොලයිසර් සියයට 75ක් ඉවරයි. අපේ අත් දැකීම තමයි මාරක රිය අනතුරු බොහෝමයකට බීමත්කම සම්බන්ධයි. මේ සියලුම දේ පොලිසිය පැත්තෙන් අපි කරනවා. ඒත් රිය අනතුරු වැඩි වෙනවා.”
“ගිය වසරට වඩා මේ කාලය ගත්තෝත මේ වසරේ රිය අනතුරු වැඩියි. මේ තරම් අප ක්රියාකාරී වෙලත් රිය අනතුරු වැඩියි කියලා කියන්නේ මේ ප්රශ්නය විසඳා ගන්න පොලිසියේ විතරක් මදි. රිය අනතුරු මැඩ ගැනීම සඳහා සියල්ල ගැන අවධානය යොමු කර විශාල වැඩපිළිවෙළක් දියත් කළේ නැතිනම් විශාල ප්රශ්නයක් ඇති වේවි…” පොලිස් මාධ්ය ප්රකාශකවරයා කීවේය.
