මනම්පිටිය නිමල් ජයරත්න –
මහවැලි ගඟේ මනම්පිටිය ප්රදේශයේ සැඩ පහරට ගසාගෙන ආ වන අලියෙකු මනම්පිටියේ පාලම අසලින් ගොඩගෙන ඒ අසල රක්ෂිතයට පලවා හැරීමට එහි සිටි ආරක්ෂක අංශ නිලධාරීන් පිරිසක් අද (20) දහවල් කටයුතු කළහ.
වන අලියා මහවැලි ගඟේ සැඩ පහරට විශාල දුරක් ගසාගෙන පැමිණ ඇති අතර මනම්පිටිය පාලම අසල දුම්රිය නිවාස ආසන්නයෙන් ගොඩ විමට ආරක්ෂක අංශවල සහාය ලැබුණි.
පසුව එම වන අලියා අසල රක්ෂිතයට පලවා හැරීමට කටයුතු කළ බව එහි ආරක්ෂක නිලධාරීහු අප කළ විමසීමකදි පැවසූහ.
ඉහළ කඳුකර සහ මධ්යම ප්රදේශවලට මේ දිනවල පවතින අධික වර්ෂාපතනය සහ පොළොන්නරුව පරාක්රම සමුද්රය ඇතුළු ඉහළ ප්රදේශවල ජලාශවල වාන් දොරටු විවෘත කිරීමත් සමග මනම්පිටිය මහවැලි ගගේ ජල මට්ටම සීග්රයෙන් ඉහළමින් පවතී.
