බලංගොඩ ප්රදේශයේ ගංජා හේනක් වගා කළ බවට පසුගිය දින කීපය පුරා චෝදනා එල්ල වුන රත්නපුර දිස්ත්රික් ජාතික ජන බලවේගයේ පාර්ලිමේන්තු මන්ත්රී ශාන්ත පද්මකුමා සුබසිංහ අද සිය වරප්රසාද කඩවිම පිළිබඳව පාර්ලිමේන්තුවේ දි වරප්රසාද ප්රශ්නයක් මතු කළේය.
මෙය සපුරා සාවද්ය ප්රකාශයක් බව කී මන්ත්රීවරයා පසුගිය 16 වැනිදායින් පසුව තමන් ඉලක්ක කරගත් මෙම මඩ ප්රහාරය සමාජගත කිරීම පිටුපස සූරියකන්ද පොලිසියේ පොලිස් ස්ථානාධිපතිවරයා ඇතුළු පුද්ගලයින් දෙදෙනෙක්, කොලොන්න ප්රාදේශීය සභාවේ මන්ත්රීවරයෙක් මෙන්ම සමගි ජන බලවේගයේ මන්ත්රීවරයෙක්වන අධිනීතිඥ යැයි කියා ගන්නා අජිත් පී පෙරේරා සිටින බවත් ඔවුන්ව වරප්රසාද කමිටුව අභියසට කැඳවා සුදුසු ක්රියාමාර්ගයක් ගන්නා ලෙසත් මන්ත්රීවරයා කතානායකවරයාගෙන් ඉල්ලා සිටියේය.
මේ අවස්ථාවේ දි නැගී සිටි විපක්ෂ නායකවරයා පැවසුවේ “අධිනීතිඥ යැයි කියාගන්නා අජිත් පී පෙරේරා ” යන ප්රකාශය හැන්සාඩ් එකෙන් ඉවත් කළ යුතු බවත් එය නුසුදුසු ප්රකාශයක් බවත්ය. අජිත් පී පෙරේරා සියලු සුදුසුකම් සපුරා ඇති විද්වත් නීතිඥයෙක් බැවින් අධිනීතිඥ යැයි කියාගන්නා ලෙස හැඳන්වීම නුසුදුසු බව විපක්ෂ නායකවරයා කීවේය.
එවිට නැගී සිටි අධිකරණ ඇමති හර්ෂණ නානායක්කාර නැගී සිට පැහැදිලි කිරිමක් කරමින් තමන් මෙම පැහැදිලි කිරීම කරන්නේ විපක්ෂ නායකවරයාට සහාය වීමට බවත් ලංකාවේ අධිනීතිඥ නමින් තනතුරක් නොමැති බවත්ය. නීතිපති දෙපාර්තමේන්තුවේ පමණක් අධිනීතිඥවරු සිටින බව ඔහු පෙන්වා දුන්නේය.
