කෝටිපති ව්යාපාරිකයෙකු වන අලි ගුලාම් හුසේන් දැනට වසර හතරකට පමණ ඉහත දී ඝාතනය කෙරුණු බවට සැක පිට රක්ෂිත බන්ධනාගාර ගත කර සිටින ඔහුගේ බාල පුත්රයා වන අලි ගුලාම් හුසේන් ලබන 08 වනදා දක්වා යළි රක්ෂිත බන්ධනාගාර ගත කරන ලෙස කොළඹ මහෙස්ත්රාත් අධිකරණය නියම කළේය.
මෙම නියෝගය කළේ එම පැමිණිල්ල අද (01) කොළඹ අතිරේක මහෙස්ත්රාත් කාංචනා නෙරන්ජනී ද සිල්වා ඉදිරියේ කැඳවනු ලැබූ අවස්ථාවේ දීය..
මෙහිදී අපරාධ පරීක්ෂණ දෙපාර්තමේන්තුව විසින් පරීක්ෂණවල ප්රගතිය දැක්වෙන වාර්තාවක් ද අධිකරණයට ඉදිරිපත් කළේය.
අනතුරුව මහෙස්ත්රාත්වරයා විසින් සැකකරු ලබන 08 වනදා දක්වා තවදුරටත් රක්ෂිත බන්ධනාගාර ගත කිරීමට නියෝග කළ අතර ඉදිරි පරීක්ෂණවල ප්රගතිය දැක්වෙන වාර්තාවක් එදින ඉදිරිපත් කරන ලෙස ද අපරාධ පරීක්ෂණ දෙපාර්තමේන්තුවට නියෝග කළේය.
2017 ජුනි 9 වන දින කෝටිපති ව්යාපාරිකයෙක් වූ ශබීර් අබ්බාස් ගුලාම් හුසේන් කොළඹ පිහිටි ඔහුගේ කාර්යාල පරිශ්රයේදී මිය ගියේය. ගුලාම් හුසේන්ගේ මරණය ස්වාභාවික මරණයක් ලෙසින් අවසන් කටයුතු සිදු කෙරිනි.
එහෙත් 2018 වසරේ අපරාධ පරීක්ෂණ දෙපාර්තමේන්තුවේ මහජන පැමිණිලි අංශයට පැමිණිල්ලක් ලැබුණේ මේ මරණය ස්වභාවික මරණයක් නොව, සාපරාධී මනුෂ්ය ඝාතනයක් බව කියමිනි. සාධාරණ පදනමක් සහිතව ඉදිරිපත් වූ ඒ පැමිණිල්ල මත අපරාධ පරීක්ෂණ දෙපාර්තමේන්තුව පරීක්ෂණ ආරම්භ කළේය. සිද්ධිය විමර්ශනයේ මූලික අදියරේ දීම මෙය සැකකටයුතු මරණයක් බව පරීක්ෂකයන් අනාවරණය කරගත්තේය.
වර්ෂ 2019 දී ව්යාපාරික ගුලාම්හුසේන්ගේ දේහය ගොඩගත්තේය. ඔහුගේ දේහය යළිත් පශ්චාත් මරණ පරීක්ෂණයක් සඳහා යොමු කෙරිනි. සියුම් විමර්ශනයක් කෙරිනි. ඔහුගේ ශරීරයේ හකු වල අස්ථි බිඳීමක් සහ වම් පැත්තේ ඉළ ඇටයක් බිඳී ඇති බව විශේෂඥයෝ නිරීක්ෂණය කළහ. අවසන් විශේෂඥ නිගමනය වූයේ ගුලාම් හුසේන්ගේ මරණය සිදු වී ඇත්තේ මොට ආයුධයකින් සිදු කරන ලද පහර දීමක් හේතුවෙන් බවය. ටයි පටියකින් ගෙල සිර කිරීමක් සිදුව ඇති බවත් අනාවරණය විය.
සිද්ධිය සම්බන්ධයෙන් දීර්ඝ පරීක්ෂණයක් පැවැත්වීමෙන් පසු අපරාධ පරීක්ෂණ දෙපාර්තමේන්තුව මෙම ඝාතනය සම්බන්ධයෙන් ව්යාපාරිකයාගේ 37 හැවිරිදි බාල පුත්රයා වූ අලි ගුලාම්හුසේන් අත්අඩංගුවට ගත්තේය.
අධිකරණය ඉදිරියේ නඩුව විභාග වෙමින් පවතී.
