කොළඹ නගරයේ රථවාහන නවතා තැබීම කළමනාකරණය කරන සමාගමක් 2020 ජනවාරි මස 01 වැනිදා සිට කොළඹ නගර සභාවට මුදල් ගෙවා නැති ඔවුන් තවමත් වාහන නවතා තබන්නන්ගෙන් අය කර ගන්නා ගාස්තු ඔවුන්ගේ සාක්කුවලට දමා ගන්නා බවත් කොළඹ නගර සභාවේ පොදු ජන පෙරමුණු පාර්ලිමේන්තු මන්ත්රිනි ෂර්මිලා ගෝනවල මහත්මිය පවසයි.
මේ වනවිට නගර සභාවට ලැබිය යුතු රුපියල් කෝටි පහක් පමණ ලබා නොදෙමින් සිටින මෙම සමාගම සමඟ පවතින ගිවිසුම අවලංගු කරන ලෙස තමන් යෝජනා කළද එම ගිවිසුම අහෝසි නොකරන ලෙස ඉහළ දේශපාලකයින් විසින් ඇයට කර ඇති බලපෑම් මත එසේ ගිවිසුම අහෝසි කර ගත නොහැකිව සිටින බව නගරාධිපතිනි රෝසි සේනානායක මහත්මිය තමන් වෙත ප්රකාශ කළ බවද මෙම මන්ත්රිවරිය පවසයි.
අදාල සමාගම නගර සභාව සමඟ එකඟ වී ඇති ගිවිසුමට අනුව ඉලක්ක ගත ප්රදේශ කිහිපයක ගාස්තු අයකිරීමේ ස්වයංක්රීය යන්ත්ර 160ක් අත්සන් කරන බවට එකඟ වුවද මේ වනවිට සවි කොට ඇත්තේ යන්ත්ර 100ක් පමණි.
එයින්ද මේ වනවිට යන්ත්ර ගණනාවක් අක්රිය වී ඇති අතර වැල්ලවත්ත ප්රදේශයේ එකදු යන්ත්රයක්වත් ක්රියාත්මක නොවන බවත් කොල්ලුපිටිය සහ ඩුප්ලිකේෂන් පාරේද ගාස්තු ගෙවීමේ යන්ත්ර අක්රිය ව පවතින බවත් සඳහන් කළාය.
එසේම මෙම ගිවිසුමට අනුව 2017 ජනවාරි මස 01 වැනිදා සිට වාහන නැවතීමේ ගාස්තු අය කරන අත්යන්ත්ර භාවිතය තහනම් වුවද මෙම සමාගම තවමත් අත්යන්ත්ර භාවිත කරන බවත් වාහන නවතා තබන්නන්ගෙන් අවිධිමත් සහ අසාධාරණ ආකාරයට ගාසතු අය කිරීම සිදු කරන බවටත් ඇය චෝදනා කළාය.
ගිවිසුම් ප්රකාරව නගර සභාවට අදාල ගාස්තු ගෙවීම් ප්රමාදවීම් සඳහා දඩ මුදලක්ද අය කෙරෙන අතර එම සියලු මුදල් එකතු කළ විට පසුගිය වසර සඳහා මෙම සමාගම රුපියල් කෝටි පහක් පමණ ගෙවිය යුතු බවත් ඔවුන් අද කරන්නේ නගර සභාවට හෝ රජයේ කිසිදු ආයතනයකට එම මුදල් ලබා නොදී බලහත්කාරයෙන් නීති විරෝධී ලෙස මෙම මුදල් තම සාක්කුවේ දමා ගැනීම පමණක් බව ඇය තවදුරටත් සඳහන් කළාය.
