ත්රස්තවාදය වැලැක්වීමේ පනත (PTA) යටතේ අන්තර් විශ්වවිද්යාල ශිෂ්ය බල මණ්ඩලයේ කැඳවුම්කරු වසන්ත මුදලිගේ සහ අන්තර් විශ්වවිද්යාල භික්ෂු බල මණ්ඩලයේ කැඳවුම්කරු ගල්වැව සිරිධම්ම හිමියන් දින 90කට අධික කාලයක් රඳවාගෙන සිටීම කිසිම ජාත්යාන්තර මානුෂීය නීතියකට එකඟ නොවන බවත් වහාම ඔවුන් නිදහස් කළ යුතු බවත් දන්වමින් ජාත්යන්තර ක්ෂමා සංවිධානයේ දකුණු ආසියා කලාපීය පර්යේෂක ත්යාගි රුවන්පතිරණ ප්රකාශයක් නිකුත් කර තිබේ.
ජාත්යාන්තර ක්ෂමා සංවිධානය ලෙස ඇය පෙන්වා දෙන්නේ වසන්ත මුදලිගේ, ගල්වැව සිරිධම්ම හිමියන් පමණක් නොව, සාධාරණ නඩු විභාගයක් සඳහා ප්රමාණවත් ප්රවේශයක් සහතික කරමින්, ත්රස්තවාදය වැළැක්වීමේ පනත යටතේ රඳවා සිටින සියලුම දෙනා රඳවා තබා ගැනීම පිළිබඳව බලධාරීන් වහාම සමාලෝචනය කළ යුතු බවය.
ඇය නිකුත් කර ඇති ප්රකාශයේ මෙසේ ද දැක්වේ.
“ශ්රී ලංකාවේ ශිෂ්ය නායකයින්ට දිගින් දිගටම එල්ල වන හිංසනයන් සිවිල් සමාජයට සහ විරෝධතා දැක්වීමේ අයිතියට දැඩි බලපෑමක් ඇති කරයි. වසන්ත මුදලිගේ සහ ගල්වැව සිරිධම්ම හිමියන්ට එරෙහි පදනම් විරහිත ත්රස්තවාදී චෝදනා වහාම ඉවත් කළ යුතු අතර රැඳවුම් නියෝගය දීර්ඝ කිරීම නැවැත්විය යුතුය. ”
“විරෝධතාකරුවන්ට එරෙහිව ත්රස්ත විරෝධී චෝදනා භාවිතා කිරීම අධික හා අසමානුපාතික ය. නමුත් ශ්රී ලංකා බලධාරීන් විසින් එම පනත නැවත නැවතත් විවේචකයන්ට සහ සුළු ජාතීන්ට එරෙහිව විසම්මුතිය නිශ්ශබ්ද කිරීමට භාවිතා කර ඇත.
ත්රස්ත විරෝධී චෝදනා යටතේ විරෝධතාකරුවන් රඳවා තබා ගැනීම ශ්රී ලංකා ආණ්ඩුක්රම ව්යවස්ථාවෙන් සහ ශ්රී ලංකා රාජ්ය පාර්ශවයක් වන සිවිල් සහ දේශපාලන අයිතිවාසිකම් පිළිබඳ ජාත්යන්තර ප්රඥප්තිය මගින් සහතික කර ඇති අදහස් ප්රකාශ කිරීමේ නිදහස සහ සාමකාමීව රැස්වීමේ අයිතිය පැහැදිලිවම උල්ලංඝනය කිරීමකි. ජාත්යන්තර මානව හිමිකම් නීතියට අනුව සාමකාමී රැස්වීම් සංවිධානය කරන හෝ ඒවාට සහභාගි වන අයව අපරාධකරුවන් ලෙස සැලකීමට ත්රස්ත විරෝධී නීති භාවිත නොකළ යුතුය.”
“ශ්රී ලංකා බලධාරීන් ජාත්යන්තර මානව හිමිකම් ප්රමිතීන්ට අනුකූල නොවන ත්රස්තවාදය වැළැක්වීමේ පනත අවලංගු කළ යුතු අතර, එහි භාවිතය අවසන් කිරීමට දැනටමත් ප්රකාශ කර ඇති කැපවීම තහවුරු කළ යුතුය. සාධාරණ නඩු විභාගයක් සඳහා ප්රමාණවත් ප්රවේශයක් සහතික කරමින්, ත්රස්තවාදය වැළැක්වීමේ පනත යටතේ රඳවා සිටින සියලුම දෙනා රඳවා තබා ගැනීම බලධාරීන් වහාම සමාලෝචනය කළ යුතුය. ජාත්යන්තර ප්රමිතීන්ට අනුකූල නොවන සමාන චෝදනාවලට මුහුණ දෙන සියලුම විරෝධතාකරුවන් නිදහස් කළ යුතුය.“
