තමන්ගේ නිශ්පාදනයක ප්රමිතිය සහතික කිරීම සඳහා ඕනෑම පර්යේෂණ වාර්තාවක් ඉදිරිපත් කිරීමේ අයිතිය නිශ්පාදන සමාගමකට තිබෙන නමුත් එම නිශ්පාදන රට තුළට ඇතුළු කරගනු ලබන්නේ රටේ පිළිගත් ආයතනවලින් කරනු ලබන පර්යේෂණවලින් අනුමත වුවහොත් පමණක් බව කෘෂිකර්ම අධ්යක්ෂ ජනරාල් ආචාර්ය අජන්ත ද සිල්වා ලංකසරට පැවසීය.
අධ්යක්ෂ ජනරාල්වරයා මේ බව පැවසුවේ ව්යාධි ජනක බැක්ටීරියා ඇති බව තහවුරු වීමෙන් පසු ප්රතික්ෂේප වුණු පොහොර තොගය අයත් චීනයෙ ක්වින්ඩාවො සීවින් බයෝටෙක් සමාගම මෙරටට එවූ පොහොර සාම්පලයක් ෂටර් ග්ලෝබර් ඉන්ස්පෙක්ෂන් ඇන්ඩ් සර්වේ නම් ජර්මානු පදනමක් සහිත සමාගමකින් පරීක්ෂා කරවා ව්යාධි ජනකයන් රහිත බවට වාර්තාවක් ඉදිරිපත් කර ඇතැයි පලවන තොරතුර සම්බන්ධව කළ විමසුමක දී ය.
අධ්යක්ෂ ජනරාල්වරයා වැඩිදුරටත් පැවසුවේ මේ වනවිට තමන් වෙත ඒ සම්බන්ධව නිල දැනුම් දීමක් සිදුකර නොමැති බවය.
ෂටර් ග්ලෝබර් ඉන්ස්පෙක්ෂන් ඇන්ඩ් සර්වේ පරීක්ෂණ සමාගම SO 4832-2006 ජාත්යන්තර ප්රමිතීන්ට අනුකූලව මෙම පරීක්ෂණය සිදු කර ඇති බවත් පැලෑටි නිරෝධායන සේවය විසින් හඳුනා ගන්නා ලද ව්යාධිජනක එහි නොමැති බවත් චීන පොහොර සමාගම මෙම වාර්තාව ඉදිරිපත් කරමින් පවසා තිබේ.
එහි පිටපත් කෘෂිකර්ම බලධාරීන් වෙත සහ ප්රධාන පෙළේ මාධ්ය වෙත යවා ඇති බව වාර්තා විය. පොහොර තොගය රැගත් නෞකාව තවමත් ශ්රී ලංකා මුහුදේ නැංගුරම් ලා ඇත.
