රටේ නීතිය ඉදිරියේ සියලුම පුරවැසියන් සමාන බවට වූ මූලධර්මයට සහතික වශයෙන්ම පණ දෙන්නේ යැයි ජනාධිපති අනුර කුමාර දිසානායක අද (30) පැවසුවේය.
ධනය නීතිය කඩා දමන්නට ශක්තියක් නොවන බවත්, බලය නීතියට වඩා උඩින් ඉන්නට හැකි මෙවලමක් නොවන බවත් පැවසු ජනාධිපතිවරයා දැනටමත් අඩු වැඩි වශයෙන් ඒ යතාර්ථය පෙන්වමින් ඇති බව අවධාරණය කළේය.
“මත්ද්රව්ය ජාවාරම හුදකලා ව්යාපාරයක් නොවෙයි. එය සමස්ථ අපරාධ දාමයක එකතුවක්.. තව ටික කාලයක් දෙන්න… සමාජ දේහය වසාගෙන ඇති මත්කුඩු ජවාරම අනිවාර්යයෙන්ම නිමා කරන බවට සහතික වෙනවා..” ජනාධිපතිවරයා පැවසුවේය.
ජනාධිපති අනුර කුමාර දිසානායක මහතා මේ බව ප්රකාශ කර සිටියේ ගල්කිරියාගම, පහමිණියාගම සිරි සමාධි මහා විහාරයේ ධාතු මන්දිරය විවෘත කිරීම හා මෙත් බෝසත් පිළිරුව නිරාවරණය කිරීමේ පුණ්යෝත්සවයට අද (30) පස්වරුවේ සහභාගි වෙමිනි.
පූජ්ය කාගම සිරිනන්ද හිමිපාණන් වහන්සේගේ ආරාධනයෙන් ජනාධිපතිවරයා මෙම අවස්ථාවට එක් වූ අතර ධාතු මන්දිරය විවෘත කිරීමෙන් අනතුරුව ඊට ප්රථම පුෂ්පෝපහාරය සිදු කිරීමද ජනාධිපතිවරයා අතින් සිදු විය.
අනතුරුව පැවති උත්සව සභාව ඇමතු ජනාධිපති අනුර කුමාර දිසානායක වැඩිදුරටත් සඳහන් කළේ තමා කිසිවිටෙක ජනාධිපති ධූරය අපේක්ෂාවෙන් කටයුතු නොකළ බවය. ජනතාවගේ දුක සැබෑ ලෙසම අත්දුටු සහ අත්විදි නායකයෙකු ලෙස සියලු පොදු ජනතාව වෙනුවෙන් සමෘද්ධිමත් රටක් ගොඩනැගීමට කැපවී කටයුතු කිරීම තමන්ගේ එකම අභිමතය බව ඔහු කීවේය.
“අපේ රටේ පැරණි දේශපාලන අධිකාරීන් අපේ රට විනාශයේ පතුලට ගෙන ගිය ආකාරය අපි හැම දෙනාම අපේ ජීවිත අත්දැකීම්වලින් අත් විඳලා තියනවා. ඒ නිසා අද අපට පැවරී තිබෙනවා මේ රාජ්ය වඩාත් සුවදායී රාජ්යයක් බවට පත් කිරීම සඳහා ප්රධාන සුක්කානම හසුරුවන්න.”
“ඒ පිළිබඳව අපේ හාමුදුරුවන් වහන්සේලා ගේ අපේ ජනතාවගේත් විශාල බලාපොරොත්තුවක් තියනවා. අපි ඔබට එක සහතිකයක් දෙන්නම්. අපි උපරිම වෙහෙස දරණවා මේ රට මීට වඩා හොඳ රටක් කරන්න. අපේ අනාගත දුවා දරුවන්ට මීට වඩා හොඳ රාජ්යයක ජීවත් වීම සඳහා පසුබිම නිර්මාණය කරන්න.”
“ඒ අප මත පැවරී තිබෙන කාර්ය භාර්යයක්. මෙතන ඉන්න අපි බොහෝ දෙනා ගම්වල ඉපදුන අය. ගම්වල දුක වේදනාව හඳුනන අය. ඒ දුක් වේදනාවන් විඳපු අය. ඒ දුක් වේදනාවන් විසින්ම අපට මේ වෙනස් කිරීම සඳහා ධෛර්ය සපයපු අය. ඒ නිසා අපට ඈත ගම්වල ජීවත්වන ජනතාවගේ ජීවිත… මේ විදිහට ඉපදිලා, ඔය මොනවා හරි කරලා ඔහේ මියැදීමට ඉඩ දිය යුතු නෑ.”
“ඔබටත් ජීවිතයක් හිමි කර දිය යුතුයි. සතුට විනෝදය, හොඳ ආහාර වේලක්, නොතෙමෙන්න නිවාසයක්, හොඳ සෞඛ්ය සම්පන්න ජීවිතයක්, දරුවන්ට අධ්යාපනයක්, හොඳ ආදායම් මාර්ගයක්…”
“මේවා පුරවැසියන් ලෙස අපට අවශ්යයයි. හැබැයි අපට, මේ රටේ සාතිශය පිරිසක් ගම්වල ජීවත්වන ජනතාවට හරියමන් ආහාර වේලක් තියනව ද?… නිරෝගී සම්පන්න ජීවිතයක් තිබෙනවා ද?… දරුවන්ට හොඳ අධ්යාපනයක් ලබාදීම සඳහා කොච්චර වෙහෙසක් දරනව ද?… නොතෙමී හිඳීම සඳහා නිවසක් ඉදිකරගැනීමට කොච්චර වෙහෙසක් දරන්න සිද්ධ වෙනව ද?…”
“ඒ නිසා දුකේ වේදනාවේ පතුලටම අපේ ජනතාව ගිලිලා තියනවා. කාගම සිරිධම්ම හාමුදුරුවන් ගම් නියම්ගම් කරා වැඩම කරමින් මේ ඛේදවාචකය සමාජයට තේරුම් කරනවා. වෙනස් කරගන්න ඕන මාවත පිළිබඳව සංඥාවන් දෙනවා. මාවත කියලා දෙනවා.”
නීතියයේ විධානය ආධිපත්ය තහවුරු කරන ලද රටක, මතු පරපුර මත්ද්රව්යවලින් බේරා ගැනීමේ වගකීම සහතික වශයෙන්ම ඉටු කරන බවත්, නීති විරෝධි මත්ද්රව්ය ජාවාරම සහ ඒ හා බැදුණු අපරාධ මැඩලීම වෙනුවෙන් අවශ්ය සියලුම ක්රියා මාර්ග ගන්නා බවත් ජනාධිපතිවරයා සහතික වුනේය.
සියලුදෙනා අපේක්ෂා කරන මෙම දියුණු රාජ්යය වෙනුවෙන් අවශ්ය සුවපත් සමාජයක් සහ සහකම්පනයෙන් යුත් පුරවැසියෙකු බිහි කිරීමේදී මෙරට මහා සංඝරත්නය ප්රමුඛ පූජ්ය පක්ෂයට විශාල කාර්යභාරයක් පැවරී ඇති බවද සඳහන් කළ ජනාධිපතිවරයා එහිදී පූජ්ය කාගම සිරිනන්ද ස්වාමින් වහන්සේ ඉටුකරමින් සිටින සමාජයීය සහ ශාසනික මෙහෙවර විශේෂ ඇගයීමට ලක් කළේය.
අනුරාධපුර අටමස්ථානාධිපති, නුවරකලාවියේ ප්රධාන සංඝ නායක ශාස්ත්රපති අතිපූජ්ය පල්ලේගම හේමරතන නායන හිමිපාණන් වහන්සේ, සියම් මහා නිකායේ මල්වතු පාර්ශ්වයේ මාතලේ දිසාවේ ප්රධාන සංඝනායක මහලකොටුවේ විමලධම්ම හිමිපාණන් වහන්සේ ප්රමුඛ ත්රෛනිකායික මහා සංඝරත්නයද, වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්ය වසන්ත සමරසිංහ, පාර්ලිමේන්තු මන්ත්රී තිළිණ සමරකෝන් ඇතුළු පිරිසක් ද මෙම අවස්ථාවට එක්ව සිටියහ.
පහත දැක්වෙන්නේ ජනාධිපතිවරයා කළ කතාවය.
