කොළොන්නාව, මීතොටමුල්ල ප්රදේශයේ ඉඩමක් ගොඩ කිරීමට අනුමැතිය දීම සඳහා රුපියල් මිලියනය 64ක් කප්පමක් ඉල්ලා ව්යාපාරිකයකුට මරණ තර්ජනය කිරීමේ අපරාධයට වරදකරු කරමින් ඇමැති ප්රසන්න රණතුංග වෙත මහාධිකරණය නිකුත් කළ තීන්දුවට අදාළ නඩු ගොනුවේ ඇති පොරොන්දු නෝට්ටු කිහිපයක් අධිකරණය හමුවට කැඳවීමට අභියාචනාධිකරණය ඊයේ (26) නීතිපතිවරයාට අවසර දුන්නේය.
කප්පම් චෝදනාවට වරදකරු වූ ප්රසන්න රණතුංගට කොළඹ මහාධිකරණය ලබා දුන් බරපතළ වැඩ සහිත වසර දෙකක සිර දඬුවමක් නියම කොට එය වසර 5කට අත්හිටුවීමට ලබා දුන් තින්දුවත්. රුපියල් මිලියන 25ක දඩයක්ද නියම කර එය නොගෙවන්නේ නම් තවත් මාස 6ක සිර දඬුවම් නියම කල තීන්දුවත්, රුපියල් මිලියනයක වන්දි මුදලක් අදාළ ව්යාපාරිකයාට ගෙවන ලෙස නියම කර එය නොගෙවන්නේ නම් තවත් මාස තුනක සිර දඬුවම් ලබා දුන් තීන්දුවත් ඇතුළු සමස්ථයෙන් තමන්ව නිදොස් කොට නිදහස් කරන ලෙස ඉල්ලා ප්රසන්න රණතුංග ගොනුකල අභියාචනා පෙත්සම අභියාචනාධිකරණයේ දී කැඳවු අවස්ථාවේ දී මෙම අවසරය ලබා දී තිබිණි .
අපරාධයෙන් තමන් නිදොස් කොට නිදහස් කරන ලෙස ඉල්ලා ඇමැති ප්රසන්න රණතුංග ගොනු කළ අභියාචන පෙත්සම ඊයේ ඩී.එන්. සමරකෝන්, සම්පත් අබේකෝන්, සම්පත් විජේරත්න, පී. කුමාරන් රත්නම් සහ මායාදුන්නේ කොරයාගෙන් සමන්විත පංච පුද්ගල අභියාචනාධිකරණ විනිසුරු මඩුල්ල හමුවේ කැඳවනු ලැබිණි.
එහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරල් රොහාන්ත අබේසූරිය අධිකරණය අමතමින් මහාධිකරණ නඩුවට අදාළව ඉදිරිපත් කළ පොරොන්දු නෝට්ටු කැඳවීමට අවසර ලබා දෙන ලෙස ඉල්ලා සිටියේය. ඉල්ලීමට අවසර දීමට විනිසුරු මඩුල්ල තීරණය කළේය. මෙම පෙත්සම ලබන අප්රේල් මස 30 වැනිදා සලකා බැලීමට විනිසුරු මඩුල්ල දින නියම කළේය.
බස්නාහිර පළාතේ ප්රධාන ඇමතිවරයා ලෙස ප්රසන්න රණතුංග කටයුතු කරද්දී මීතොටමුල්ල ප්රදේශයේ ඉඩම් ගොඩ කිරීමකට අදාළව ව්යපාරිකයෙකුගෙන් රුපියල් මිලියන 64 ක මුදලක් ඉල්ලා තර්ජනය කළ බවට චෝදනා කරමින් ඔහුට එරෙහිව නීතිපතිවරයා විසින් මහාධිකරණය හමුවේ නඩු පවරා තිබුණි. ඒ සම්බන්ධයෙන් දීර්ඝ නඩු විභාගයක් පැවැත්වූ කොළඹ මහාධිකරණය ප්රසන්න රණතුංග වරදකරු කරමින් එහි තීන්දුව 2022 ජූනි 6 දා ප්රකාශයට පත් කළේය.
ජනාධිපති නීතිඥ ෆායිස් මුස්තාපා මහතා සමග නීතිඥ කීර්ති තිලකරත්න පෙත්සම්කාර ප්රසන්න රණතුංග වෙනුවෙන් පෙනී සිටියහ.
