ඖෂධ නියාමන අධිකාරියේ ප්රධාන විධායක නිලධාරී ප්රජා සෞඛ්ය විශේෂඥ වෛද්ය වෛද්ය සවීන් සේමගේ ජාතික ඖෂධ නියාමන අධිකාරියේ අධ්යක්ෂ මණ්ඩලයට ලිපියක් යොමු කරමින් සිය ඉල්ලා අස්වීම පිළිබඳව දැනුම් දී තිබේ.
තමන්ට ඉල්ලා අස්වීමට කී නිසා ඉල්ලා අස්වන බව ඔහු සිය ලිපියේ උදෘතය ලෙස දක්වා ඇත.
යුද හමුදා වෛද්යවරයෙක් වූ ප්රජා විශේෂඥ වෛද්ය සේමගේ ජනාධිපතිවරයාගේ පත්කිරීමක් වන අතර ඔහු සිය ඉල්ලා අස්වීම යොමු කරන්නේ ජාතික ඖෂධ නියාමන අධිකාරිය අද කෝප් කමිටුව වෙත කැඳවා ඇති අවස්ථාවේය.
රටේ පවතින ඖෂධ අර්බුදයට වගකිව යුත්තේ ඖෂධ නියාමන අධිකාරිය බව පවසමින් දේශපාලන අඳබාලයන් ඇතුළත්වන වෘත්තිය සමිති කණ්ඩායම් හා දේශපාලන අධිකාරිය ශ්රී ලංකාවේ ඖෂධ නියාමනය අකුලා දමන්නටත් අධිකාරියේ කළමනාකාරිත්වය ඉවත් කිරීමටත් කැස කවමින් සිටින මේ මොහොතේ ඖෂධ නියාමන අධිකාරියේ ප්රධාන විධායක නිලධාරී ලෙස තමාගේ කතාව සටහන් කරන බව ඔහු දන්වා ඇත.
අනිසි දේශපාලන අතපෙවීම්වලට අනුබල නොදීම තමන් අස්කිරීමට මූලික හේතුවක් වූ අතර සෞඛ්ය අමාත්යාංශයේ දුෂිත නිලධාරීන්ගේ උසිගැන්වීම් සහ කේලම් බස් ඊට ඉනිමන් බඳින්නට කටයුතු සැකසුණු බවත්, ඖෂධ නියාමන අධිකාරියේ ගත කළ කාලය තුළ රාජ්ය සේවය මොනතම් දූෂිත ද යන්න තමන් වටහා ගත් බවත් වෛද්ය සවීන් සේමගේ පවසා තිබේ..
තනතුරෙන් ඉවත් වන ලෙස දන්වන ලද හෙයින් තමන් ඖෂධ නියාමන අධිකාරියේ ප්රධාන විධායක නිලධාරී තනතුරෙන් ඉල්ලා අස්වන බව ඔහු ප්රකාශ කරයි.
සෞඛ්ය අමාත්යාංශය වැනි දුෂිත නිලධාරීන් සිටින ආයතනයක ටික කලක් හෝ සේවය කිරීමට සිදුවීම තමන්ගේ අභාග්යක් ලෙස සලකන අතර වෘත්තීය ගෞරවය රැකගෙන දුෂණය සඳහා කිසිදු බලපෑමක් සිදු නොකර තෘප්තියෙන් රාජකාරි කල හැකි පරිසරයක් සහිත ශ්රී ලංකා යුධ හමුදාව පිළිබඳව නිත්ය රැකියා ස්ථානය ලෙස තමන් හුදෙක්ම ආඩම්බරවන බවත්, කිසි දිනෙක රාජකාරි සඳහා අනිසි බලපෑම් නොකර නිවැරදි නිර්භීත නායකත්වය ලබා දීම පිළිබඳව යුද්ධ හමුදාපති ජෙනරාල් ශවේන්ද්ර සිල්වා මෙම අවස්ථාවේ දී ගෞරවයෙන් සිහිපත් කරන බවත් ඔහු කියයි. .
