පෙරේදා කොළඹ වාණිජ මහාධිකරණයෙන් ලබා දුන් තීන්දුවක් අනුව එක්ස්ප්රස් පර්ල් නෞකාව අයත් සමාගමේ නෞකාවක් කොළඹ වරායේ නැංගුරම් ලා තිබිය දී වෙළෙඳ නාවික අධ්යක්ෂ කාර්යාලය භාරයට ගෙන ඇතැයි වාර්තා වේ.
ඊයේ රාත්රියේ මෙසේ අත්අඩංගුවට ගෙන ඇත්තේ එක්ප්රස් කුහිමා නැමැති නෞකාවය.
පසුගිය වසරේ මුහුදුබත් වූ එක්ප්රස් පර්ල් නෞකාවේ තිබී මුහුදුබත් වූ ඇමරිකානු ඩොලර් ලක්ෂ හයකට අධික වටිනාකම සහිත බහාලුම් හයක් අයත් සමාගමක් වෙනුවෙන් හානි පූර්ණය සඳහා නෛතික පියවර ගෙන තිබුණු නමුත් එම හානිපූර්ණය කිරීම සමාගම විසින් පැහැර හැර ඇති බවත්, නාවික නීතිය අනුව එවැනි තත්වයක දී සමාගමේ වෙනත් නෞකාවක් හානි පූර්ණ සුරක්ෂිතයක් ලෙස තබා ගත හැකි බවත් වරාය ආරංචි මාර්ග සඳහන් කරයි.
ඒ නෛතික තත්වය යටතේ එක්ස්ප්රස් කුහිමා නෞකාව රඳවා තබා ගන්නට කොළඹ වාණිජ මහාධිකරණය නියෝගයක් නිකුත් කර තිබේ.
