විස්සයි 20 ලෝක කුසලාන තරගාවලියේ එක්සත් අරාබි එමීර් රාජ්ය කණ්ඩායම සහ ශ්රී ලංකා කණ්ඩායම අතර පැවති තරයේ දී එක්සත් අරාබි එමීර් රාජ්ය කණ්ඩායම‘ ලකුණු 79කින් පරාජය කිරීමට ශ්රී ලංකා කණ්ඩායම අද සමත් විය..
එම ජයග්රහණයත් සමඟින් ශ්රී ලංකාව මේ වන විට ශුද්ධ ලකුණු අනුපාතයෙන් නෙදර්ලන්තය අභිබවා ගොස් සිටී. ඊලඟ තරගයේ ජයග්රහණයක් ලැබුවහොත් ශ්රී ලංකා කණ්ඩායම මීළඟ කාණ්ඩයට ඇතුළු වනු ඇත.
ගීලොන් හි අද පැවති තරගයේ දී ශ්රී ලංකාවට එරෙහිව කාසියේ වාසිය දිනූ එක්සත් අරාබි එමීර් රාජ්ය කණ්ඩායම ප්රථමයෙන් පන්දු රැකීමට තීරණය කළේය.
ශ්රී ලංකාව නියමිත පන්දුවාර 20 තුළ කඩුලු 08ක් දැවී ලබා ගත්තේ ලකුණු 152ක් පමණි.
පැතුම් නිශ්ශංක පන්දු 60කදී ලකුණු 72ක් ලබා ගනිමින් වැඩිම ලකුණු ලාභියා බවට පත් විය. ධනංජය ද සිල්වා පන්දු 21කදී ලකුණු 33ක් සහ කුසල් මෙන්ඩිස් පන්දු 13කදී ලකුණු 18ක් ලබා ගත්තේය. අනෙක් කිසිවෙක් ලකුණු 10 සීමාව පසු කළේ නැත.
සැබැවින්ම එක්සත් අරාබි එමීර් පන්දු යවන්නෝ විශිෂ්ට පන්දු යැවීමක නිරත වූහ. ශ්රී ලංකා නායක දසුන් ශානක ලකුණු නොලබා දැවී ගියේය. චරිත් අසලංක නැවතත් පරාදය. ඔහු ලකුණු ලැබුවේ නැත.
එක්සත් අරාබි එමීර් රාජ්ය පන්දු යවන්නෙක් වූ කාර්තික් මේයප්පන් වික්රමයක් කළේය. ඒ මෙම ලෝක කුසලාන තරගාවලියේ පළමු කඩුළු ත්රිත්වය ලබා ගනිමිනි. ලෝක කුසලාන තරගාවලියේ වීරයා වන්නට අවශ්ය බව කී භානුක රාජපක්ෂත්, චරිත් අසලංක සහ දසුන් ශානක කාර්තික්ගේ කඩුළු ත්රිත්වයේ ගොදුරු බවට පත් විය.
එක්සත් අරාබි එමීර් රාජ්යය වෙනුවෙන් සහූර් ඛාන් කඩුලු 2ක් ද, අෆ්සාල් ඛාන් සහ ආර්යන් ලක්රා එක් කඩුල්ල බැගින් ද බිඳ දැමූහ.
ලකුණු 153ක ඉලක්කයක් හඹාගිය එක්සත් අරාබි එමීර් කණ්ඩායමට ඕවර 17.1කදී සියලු දෙනා දැවී රැස්කරගත හැකිවූයේ ලකුණු 73ක් පමණි.
අෆ්සාල් ඛාන් ලකුණු 19කටත්, ජුනයිඩ් සිද්ධික් පන්දු 16කදී ලකුණු 18කටත්, චිරාග් සූරි ලකුණු 14කටත්, සෙසු ක්රීඩකයින් ලකුණු 10කට අඩුවෙන් ද දැවී ගියහ.
ශ්රී ලංකාවේ වනිඳු හසරංග සහ දුෂ්මන්ත චමීර කඩුලු 3 බැගින් දවාගත්හ.
මහේෂ් තීක්ෂණ කඩුලු 2ක් ද, ප්රමෝද් මධුෂාන් සහ නායක දසුන් ශානක එක් කඩුල්ල බැගින් ද බිඳ දැමූහ.
ශ්රී ලංකාව ඔක්තෝම්බර් 20 දා බ්රහස්පතින්දා නෙදර්ලන්තය සමග ගීලෝන් හිදී තරග වදිනු ඇත.
