දිනසේන රතුගමගේ –
තමන්ට දේශපාලන වශයෙන් කුමන රජයකින් වූවත් මර්දනයක් හා තර්ජනයක් එල්ල වූවත් උතුරේ මුස්ලිම් ජනතාවගේ අයිතිවාසිකම් වෙණුවෙන් තම ජීවිතය පරදුවට තබා කටයුතු කරණ බව සමස්ත ලංකා මුස්ලිම් මහජන කොංග්රසයේ වන්නි දිස්ත්රික් පාර්ලිමේන්තු මන්ත්රී රිෂාර්ඩ් බදුයුදීන් මහතා 30 දා පැවසීය.
ඔහු මේ බව පැවසුවේ මුලතිව් ප්රදේශයට පැමිණ මුලතිව් පළාතේ යළි පදිංචි කොට සිටින මුස්ලිම් ජනතාව හමු වීමෙන් අනතුරුවය.
තමන්ගේ දේශපාලන ජීවිතය අවසන් කිරීමට බොහෝ පිරිසක් ආකාර කීපයකට කටයුතු කරන බව මෙහිදී පැවසූ රිෂාර්ඩ් බදුයුදීන් මන්ත්රීවරයා මේ වන විට තමන්ගේ ජීවිතය පවා විශාල අනතුරකට පත්ව ඇති බවද ප්රකාශ කළේය.
ඒ කෙසේ වෙතත් උතුරේ සිංහල දෙමළ හා මුස්ලිම් ජනතාව තමන් පිළිබදව ඉතා මැනවින් කරුණු දන්නා නිසා ඒ ජනතාවගේ ප්රසාදය හා සහයෝගය ලැබීම ගැන තමන් ඉතා සතුටට පත්වන බවද කියා සිටියේය.
තමන් බන්ධනාගාරගතව සිටි කාලයේදී වන්නියේ මුස්ලිම් ජනතාව තමන් වෙණුවෙන් දෙවියන් වහන්සේට යාඥා කරමින් සාධාරණය ඉටු වන ලෙස ප්රාර්ථනා කළ බවද දැන් සාධාරණය ඉටු වෙමින් පවතින බවද පැවසූ රිෂාර්ඩ් බදුයුදීන් මන්ත්රීවරයා පාස්කු ප්රහාරයට තමන් සම්බන්ධ නොමැති බව පොලීසිය විසින් හා වෙනත් ආරක්ෂක අංශ විසින්
තහවුරු කොට තිබියදී දේශපාලන වාසි වෙනුවෙන් තමන්ව වරදකරු කිරීමට උත්සහ කරණ බවද පැවසීය.
