දිනසේන රතුගමගේ –
තුන් දින නිල සංචාරයක් සදහා දිවයිනට පැමිණි ඉන්දීය මුදල් අමාත්ය නිර්මලා සීතාරාමන් යාපනයේ සංචාරය කොට ඉන් අනතුරුව යාපනය ජාත්යාන්තර ගුවන් තොටුපලෙන් අද (3) සවස ඉන්දියාව බලා පිටත්ව ගියාය.
යාපනයට පැමිණි ඉන්දීය මුදල් අමාත්යවරිය උතුරු පළාත් ආණ්ඩුකාර පී.එම්.එස්.චාර්ල්ස් විසින් උණුසුම් ලෙස පිළිගනු ලැබූ අතර ඉන් පසුව සියලු දෙනාම යාපනයේ සංවිධානය කොට ඇති නව තාක්ෂණ හා නිපයුම් වෙළඳ ප්රදර්ශනය නරඹනු ලැබීය.
ඉන්දීය මුදල් අමාත්යවරිය ඉන් පසුව ඉන්දීය මුදල් ආධාර යටතේ යාපනයේ ඉදි කරණු ලැබූ සංස්කෘතික මධ්යස්ථානයට ගොස් යාපනයේ පාර්ශ්ව කීපයකට අයත් පිරිස් හමු වී සාකච්ඡා කළහ.
මෙහිදී යාපනයේ ධීවර ජනතාව ඉදිරිපත් කළ ගැටලු යුද්ධයෙන් පීඩාවට පත් ජනතාවගේ ගැටලු ඇතුලු ගැටලු රාශියක් පිළිබඳව අදාල පාර්ශ්ව සමග සාකච්ඡා කොට ඒවාට හැකි අන්දමේ විසඳුම් ඉන්දීය රජයෙන් ඉතා කඩිනමින් ලබා දෙන බවටද පොරොන්දු වුවාය.
යාපනයේ පාසල් සිසුන් පිරිසක් සමග සාකච්ඡා කළ ඉන්දීය අමාත්යවරිය ඔවුන්ගේ පාසල්වල දැනට පවතින අඩුපාඩුකම් හා අධ්යාපන කටයුතුවල තත්ත්වය පිළිබඳව කරුණු විමසා බැලීය.
උතුරේ දෙමළ දේශපාලන පක්ෂ කීපයක් විසින් ඉන්දීය මුදල් අමාත්යවරිය හමුවීමට ඉල්ලීමක් කොට තිබූ නමුත් ඔවුන්ගේ එම ඉල්ලීමට ඉඩක් ලැබී නොතිබුණි.
ඉන්දීය අයෝජන බැංකුවේ ශාඛාවක් යාපනයේ විවෘත කොට යාපනය පුස්තකාලය නැරඹූ ඉන්දීය මුදල් අමාත්යවරිය නල්ලූර් කෝවිලේ පැවති විශේෂ දේව පූජාවකට සහභාගී වීමෙන් පසුව ආපසු ඉන්දියාව බලා පිටත්ව ගියාය.
මෙම අවස්ථාවන්ට රාජ්ය අමාත්ය තාරක බාලසූරිය ඇතුලු පිරිසක් සහභාගී වූහ.
