භාණ්ඩ ප්රවාහන දුම්රියක් රියදුරන් නොමැතිව කිලෝමීටර් 70කට වැඩි දුරක් ධාවනය වූ සිදුවීමක් ඉන්දියාවෙන් වාර්තා වනවා.
ඉරිදා එනම් ඊයේ (25) දින ජම්මු කාශ්මීරයේ කතුවා සිට පන්ජාබ් හි හෝෂියාර්පූර් දක්වා ධාවනය වූ දුම්රියක් මෙලෙස රියදුරෙකු නොමැතිව ධාවනය වූ බවයි වාර්තා වන්නේ.
දුම්රිය නවත්වා ගැනීමට නිලධාරීන් සමත්ව ඇති අතර කිසිවෙකුටත් හානියක් සිදුවී නොමැති බව සඳහන් වනවා.
ගල් කැබලි රැගත් වැගන් 53 දුම්රිය ජම්මු සිට පන්ජාබ් වෙත යමින් සිටියදී කාර්ය මණ්ඩලයේ වෙනසක් සඳහා කතුවා හි නතර වී තිබෙනවා. දුම්රිය රියදුරු සහ ඔහුගේ සහායකයා බැසීමෙන් පසු දුම්රිය බෑවුමක් සහිත දුම්රිය මාර්ගයේ කිරීමට පටන් ගෙන ඇති බවයි නිලධාරීන් පවසන්නේ. පැයට කිලෝමීටර් 100කට ආසන්න වේගයකින් ගමන් ගත් දුම්රිය නැවතුම්පො ළවල් පහක් පමණ පසු කර තිබෙනවා.
කෙසේවෙතත් දුම්රිය රියදුරන් රහිත ව ධාවනය වන බව දැනගත් වහාම නිලධාරීන් එහි ගමන් කරන දුම්රිය හරස් මාර්ග වසා දමා තිබෙනවා.
පසුව දුම්රිය නැවැත්වීම සඳහා නිලධාරියෙකු දුම්රිය මාර්ගයට ලී කුට්ටි තැබීමෙන් පසුව දුම්රිය නතර කරන ලද බවයි ඉන්දීය මාධ්ය වාර්තා කරන්නේ.
ඉන්දීය දුම්රිය දෙපාර්තමේන්තුව මේ සම්බන්ධව පරීක්ෂණයක් පවත්වන්නට නියෝග කර ඇති බව වැඩිදුරටත් සඳහන් වන අතර මේ සිදුවීමට අදාල දර්ශන සමාජ මාධ්යවල සංසරණය වෙමින් තිබෙනවා.
