දිනසේන රතුගමගේ –
ඉලංකෙයි තමිල් අරුසු කච්චි පක්ෂයට (ITAK ) මහ ලේකම්වරයෙකු තෝරා ගැනීම සඳහා පැවති ඡන්ද විමසීමේදී සිදුව ඇති අක්රමිකතාවයන් කීපයක් නිසා පත් වූ පුද්ගලයාගේ මහ ලේකම් ධුරය අහෝසි කිරීමටත් යළි ඉදිරි දිනක මේ සදහා ඡන්දය විමසීමක් පැවැත්වීමටත් පක්ෂයේ මධ්යම කාරක සභාව ඊයේ (27) තීරණය කොට තිබේ.
ඉලංකෙයි තමිල් අරුසු කච්චි පක්ෂයේ නව නායකයා වශයෙන් කිළිනොච්චියේ එස්.ශ්රීධරන් මන්ත්රීවරයා තේරී පත් වීමෙන් පසුව එම පක්ෂයට මහ ලේකම්වරයෙකු පත් කරගැනීමට අවශ්ය වූයේය.
මෙහිදී හය දෙනෙකුගේ නම් ඉදිරිපත්වීම නිසා මීළඟට පක්ෂයේ මධ්යම කාරක සභාව රැස්වන දිනයේදී ඡන්ද විමසීමකින් මහ ලේකම්වරයා තෝරා පත් කර ගැනීමට තීන්දු වූ අතර ඒ අනුව ත්රීකුණාමළයේ පෞද්ගලික හෝටලයකදී පැවති ඡන්ද විමසීමේදී උතුරු පළාත නියෝජනය කරමින් මහ ලේකම් ධුරයට තරග කළ එස්.කුගදාසන් පක්ෂයේ මහ ලේකම් ධූරයට තේරී පත් විය.
මේ අවස්ථාවේදී ඡන්දය ප්රකාශ කිරීමේදී පුද්ගලයින් කිප දෙනෙකුම අත් දෙකම ඔසවා ඡන්දය ප්රකාශ කළ බවට චෝදනාවක් එල්ල වූ අතර එහිදී සුමන්තිරන් මන්ත්රීවරයාද එය සනාථ කරමින් ඡන්දය ප්රකාශ කළ පිරිස හා ලැබූ ඡන්ද ප්රමාණය ගලපා බැලීමේදි යම් පරස්පරතාවයක් තිබූ නිසා මාවෙයි සේනාධිරාජා හිටපු මන්ත්රීවරයා ඡන්දය අවලංගු කිරීමට පියවර ගෙන තිබේ.
මීට අමතරව තවත් චෝදනා හා යෝජනා ගණනාවක් මධ්යම කාරක සභාවට ඉදිරිපත් වීමත් සමගම උතුරේ පිරිස හා නැගෙනහිර පිරිස අතර පැහැදිලි බෙදීමක් හා විරසකහාවයක් පෙන්නුම් කිරීම නිසා පක්ෂයේ මධ්යම කාරක සභාවේදී කිසිදු යෝජනාවක් සම්මත කර ගැනීමට හෝ බොහෝ යෝජනා ඉදිරිපත් කිරීමට නොහැකි තත්ත්වයක් හට ගෙන තිබුණි.
සභාව තුළ විශාල ගාලගෝට්ටියක් හා මතවාද මැද සිදු වූ කෑකෝ ගැසීම නිසා සභාව නිසි ක්රමවේදයකින් තොරව හමාර කිරීමට පක්ෂයේ නායකයින්ට සිදුවුණි.
යළි මධ්යම කාරක සභාව රැස්වන දිනයක් හෝ ඡන්දය පැවැත්වෙන දිනයක් මෙතෙක් ප්රකාශයට පත් කොට නොමැත.
