ශ්රියානි විජේසිංහ –
ප්රශ්න සහගත ඉමියුනොගොලොබියුන් වංචාවට සමගාමී ලෙස ඖෂධ තුන්සියයකට ආසන්න ප්රමාණයක් මෙරටට ගෙන්වීම සඳහා ව්යාජ ටෙන්ඩර් ලේඛන සකස්කර කැබිනට් මණ්ඩලය වෙත යොමු කිරීමට කටයුතු කළ සෞඛ්ය අමාත්යාශයේ ඉහළ නිලධාරීන් සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශන ආරම්භ කොට ඇතැයි වාර්තාවේ.
බාල ඖෂධ ගනුදෙනුව සම්බන්ධයෙන් අදාල ටෙන්ඩර් ලේඛන සකස් කිරීමට සම්බන්ධ වු සෞඛ්ය අමාත්යාංශයේ දැනට සේවය කරන වෛද්යවරුන් කිහිපදෙනෙකුගෙන් ඉදිරි සතියේදී ප්රකාශ ලබා ගැනීමට නියමිත බව අමාත්යංශයේ ජ්යෙෂ්ඨ ප්රකාශකයෙකු පැවසුවේය.
එසේම සෞඛ්ය අමාත්යාංශයේ ඖෂධ ප්රසම්පාදනයට අදාල තාවකාලිකව ලියාපදිංචිය නිකුත් කිරීමේ ලිපි නිකුත් කරන ලෙසට උපදෙස් ලබා දුන් දැනට සේවය කරන වෛද්ය සේවා අතිරේක ලේකම්වරයෙකුගෙන්ද ප්රශ්න කිරීමට නියමිත බව වාර්තා වෙයි.
සෞඛ්ය අමාත්යාංශය, වෛද්ය සැපයුම් ඒකකය,ඖෂධ නියාමන අධිකාරිය, රැධිර බැංකුව, රාජ්ය ඖෂධ නීතිගත සංස්ථාව හා ඖෂධ නිෂ්පාදන සංස්ථාවේ සේවය කරන නිලධාරින් රැසකගෙන් ද ඉදිරි කාලයේදී ප්රශ්න කිරීමට නියමිත බව වාර්තා වී ඇතැයිද එම ප්රකාශකයා සඳහන් කළේය.
