සූරියවැව නුවන් ජයසේකර
-
හුංගම පොලිසියේ අපරාධ අංශයේ ස්ථානාධිපති ඇතුළු පොලිස් නිළධාරීන් සිව් දෙනෙකුට හම්බන්තොට මහාධිකරණය මරණීය දණ්ඩනය නියම කරයි.
-
ලංකා ඉතිහාසයේ පොලිස් නිළධාරීන් සිව් දෙනෙකුට එක්වර මරණීය දණ්ඩනය ලබා දුන් මුල්ම අවස්ථාව මෙයයි.
වසර 18කට පෙර තිස්සමහාරාම දෙබරවැව මාතරවත්තදී සොරකමකට සම්බන්ධ සැකකරුවෙකු අත්අඩංගුවට ගැනීමට ගොස් වෙඩි තබා ඝාතනය කිරීමේ චෝදනාවකට වරද කරු වූ හුංගම පොලිස් ස්ථානයේ අපරාධ අංශයේ ස්ථානාධිපති වරයා ඇතුළු පොලිස් නිළධාරීන් සිව් දෙනෙකුට හම්බන්තොට මහාධිකරණ විනිසුරු ප්රියන්ත ලියනගේ මහතා අද (15) මරණීය දණ්ඩනය නියම කළේය.
මෙලෙස මරණීය දණ්ඩනය නියම වුයේ හුංගම පොලිසියේ අපරාධ අංශයේ ස්ථානාධිපතිවරයා ලෙස කටයුතු කරනු ලබන අම්බලන්තොට රිදියගම පදිංචි 58 හැවිරිදි පොලිස් පරීක්ෂක අරංවල ගමගේ උපුල්, තිස්සමහාරාම පදිංචි දැනට විශ්රාමික පොලිස් කොස්තාපල් වරයෙකු වන 63 හැවිරිදි ජයන්ති වාසගේ සුසිල් ජයබන්ධු, හම්බන්තොට වරාය පොලිසියේ රාජ්ය බුද්ධි සේවාවට අනුයුක්තව දැනට රාජකාරි සිදුකරනු ලබන පොලිස් කොස්තාපල් වරයෙකු වන දම්මුල්ල බෙලිඅත්ත පදිංචි 51 හැවිරිදි සරඹගේ සිරිල් හා එවකට තිස්සමහාරාම පොලිසියේ පොලිස් කොස්තාපල් වරයෙකු ලෙස කටයුතු කර දැනට සේවයෙන් පහ කර සිටින මහදිවුල්වැව, අඹන්පොල ලිපිනයේ පදිංචි 46 හැවිරිදි පතිරාජ මුදියන්සේලාගේ රංජිත් සුසන්ත නැමති චුදිතයින් තිදෙනාටය.
චුදිතයින් 2005 ජුනි 29 වන දින තිස්සමහාරාම දෙබරවැව මාතර වත්ත ප්රදේශයේදී සොරකම් තුනක් සම්බන්ධයෙන් සැකපිට සැකකරුවෙකු අත්අඩංගුවට ගැනීමට මෙහෙයුමක් දියත් කර තිබේ.
එහිදී රාත්රි 12ට පමණ දෙබරවැව මාතර වත්ත ප්රදේශයේ පිහිටි සැකකරුගේ නිවස වටලා සැකකරු අත්අඩංගුවට ගෙන පසුව සැකකරුට දිව යන ලෙස පවසා වෙඩි තැබිම සිදුකර ඇති බව මුලික පොලිස් විමර්ශන වලදි අනාවරණය වී ඇත.
පොලිස් වෙඩි තැබීමෙන් මියගොස් ඇත්තේ දෙබරවැව මාතර වත්ත පදිංචි ලොකු හැන්නදිගේ අමිල මහේෂ් නැමති අයයි. වැටලිම සිදුකළ පොලිස් නිළධාරීන් විසින් සැකකරු නිවසින් එළියට ගෙන දිව යන ලෙස පවසා වෙඩි තබා ඇති අතර පසුදින උදෑසන සැකකරු ඒ ආසන්නයේ නිවසක් අසල වෙඩි වැදී මියගොස් සිටියදී තිස්සමහාරාම පොලිසියට පැමිණිල්ලක් ලැබී තිබේ.
ඒ අනුව සිද්ධිය සම්බන්ධයෙන් එවකට තංගල්ල කොට්ඨාසභාරව කටයුතු කළ පොලිස් අධිකාරී වරයාගේ උපදෙස් පරිදි විමර්ශන කටයුතු සිදුකෙරුණි.
අනතුරුව සිද්ධිය සම්බන්ධයෙන් සැකපිට වැටලීම සිදුකළ පොලිස් නිළධාරීන් සිව් දෙනා අත්අඩංගුවට ගෙන තිස්සමහාරාම මහේස්ත්රාත් අධිකරණයට ඉදිරිපත් කෙරුණි. එහිදී පැවති මුලික නඩු විභාගයෙන් අනතුරුව චුදිතයින් සිව් දෙනාට එරෙහිව නීතිපති වරයා විසින් හම්බන්තොට මහාධිකරණය හමුවේ 2006.06.29 වන දින මනුෂ්ය ඝාතනයක් සිදුකිරීමේ චෝදනා යටතේ අධිචෝදනා ගොනු කරන ලදි.
ඒ අනුව පැවති දීර්ඝ නඩු විභාගයකින් අනතුරුව පැමිණිල්ල විසින් චුදිතයින් සිව් දෙනාට එරෙහිව නගා තිබූ අධිචෝදනාව සාධාරණ සැකයෙන් ඔබ්බට ඔප්පු කිරීම හේතුවෙන් චුදිතයින් සිව් දෙනාටම හම්බන්තොට මහාධිකරණ විනිසුරු ප්රියන්ත ලියනගේ මහතා මරණීය දණ්ඩණය නියම කෙරුණි.
මරණීය දණ්ඩනය නියම කෙරුණි චුදිතයින් සිව් දෙනාට ශ්රී ලංකා ජනාධිපතිවරයා විසින් නියම කරන දිනකදී ස්ථානයදී මරණීය දණ්ඩණය නියම කරන තෙක් වැලිකඩ බන්ධනාගාරයේ රඳවා තබන ලෙසට අගුණුකොළපැලැස්ස බන්ධනාගාර අධිකාරී වරයාට මහාධිකරණ විනිසුරු වරයා නියම කළේය.
මෙය ලංකා ඉතිහාසයේ පොලිස් නිළධාරීන් සිව් දෙනෙකුට එකවර මරණීය දණ්ඩනය පැනවු පළමු නඩු තීන්දුවය.
නිතිපති වරයා වෙනුවෙන් රජයේ අධීනීතීඥ නිමංක ජයවික්රම මහතා පැමිණිල්ල මෙහෙයවන ලදි.
