ඉතිහාසයේ කිසිම අවස්ථාවක ඡන්ද පත්රිකා මුද්රණයේ දී මුද්රණයට පෙර මුදල් ගෙවීමක් සිදුකර නැති බව රජයේ මුද්රණ සේවක සංගමය පවසයි.
එම සංගමයේ ලේකම් අසංක සඳරුවන් පෙන්වා දෙන්නේ ඉතිහාසය පුරා මෙතෙක් සිදුවූයේ ඡන්ද පත්රිකා මුද්රණය කර අනතුරුව ඒ සම්බන්ධ වූ පූර්ණ වියදම් ගණනයකින් අනතුරුව මුද්රණාල වියදම මැතිවරණ කොමිසමට ඉදිරිපත් කිරීම බවය.
“ ඡන්ද පත්රිකා මුද්රණය කරලා ඉවර වෙලා අපි අපේ වියදම ඉදිරිපත් කරනවා. ඉන් අනතුරුව තමයි අපිට මැතිවරණ කොමිසම මුද්රණාල වියදම ප්රතිපූර්ණ කරන්නෙ.”
ලේකම්වරයා පැවසුවේය. ඔහු පෙන්වා දෙන්නේ මේ අවස්ථාව ඉතිහාසයේ වෙනස්ම අවස්ථාවක් බවය.
රජයේ මුද්රණාලාධිපතිනිය වූ ගංගානී ලියනගේ දැඩි දේශපාලන බලපෑමකට යටත්ව ක්රියා කරන බව නිරීක්ෂණය වූයේ යැයි මැතිවරණ ප්රචණ්ඩ ක්රියා නිරීක්ෂණ මධ්යස්ථානයේ මෙහෙයුම් ප්රධානී නීතිඥ ඩී.එම්. දිසානායක මාධ්යයට පැවසුවේය.
“මුදල් ගෙවා අවසන් වූ පසු ඡන්ද පත්රිකා මුද්රණය කිරීමක් මෙතෙක් ඉතිහාසයේ වෙලා නෑ. ඡන්ද පත්රිකා මුද්රණය කළ පසු තමයි මුද්රණාල වියදම පියවන්නේ.”
“නමුත් මේ මොහොතේ දේශපාලනික වශයෙන් එල්ල වූ බලපෑම් මත ඇය විසින් මෙම ඡන්ද පත්රිකා මුද්රණය කිරීම නවත්වා ඇති බව අපට නිරීක්ෂණය වෙනවා.” ඔහු කීවේය.
