දිනසේන රතුගමගේ –
වවුනියාවේ මරක්කාරම්පලෙයි ප්රදේශයේ පිහිටි ඇලුමිනියම් හා ප්ලාස්ටික් කම්හලක් 24 දා සවස හදිසියේම ගිනි ගැනීම නිසා රුපියල් කෝටි පහක පමණ අලාභයක් සිදුව තිබේ.
එම කර්මාන්ත ශාලාවේ භාවිත කරණ ලද රසායන ද්රව්යයක් හේතුවෙන් හෝ විදුලිය කාන්දුවීමකින් මෙම ගින්න හට ගන්නට ඇතැයි විශ්වාස කෙරෙන අතර ගින්නෙන් කර්මාන්ත ශාලාවේ ගොඩනැගිලි, භාණ්ඩ ,හා කර්මාන්ත ශාලාවේ නිපදවන ලද නිමි භාණ්ඩ හා වාහනද ගිනි ගෙන තිබේ.
වවුනියාව නගර සභාවේ හා පොලීසියේ ගිනි නිවන ඒකක වහාම අදාල ප්රදේශයට පැමිණ ගින්න නිවා දැමීමට කටයුතු කළත් ඒ වන විට ගින්නෙන් විශාල හානියක් කර්මාන්ත ශාලාවට සිදුව තිබුණි.
රසායන ද්රව්යවලට ගිනි ගැනීමෙන් පසුව කලු පැහැති විශාල දුමාරයක් අහසට නැගී එන්නට පටන් ගත් අතර එම දුමාරය ගිනි නිවීමේ කටයුතුවල නිරතව සිටි නිලධාරීන්ටද විශාල බාධාවක් වුණි.
එම දුමාරය නිසා හුස්ම ගැනීමේ අපහසුතාවයක් හටගත් අතර මේ වන විටද මරක්කාරම්පලෙයි ගම්ම්මානය පුරා දැඩි දුගඳක් හමමින් පවතී.
වවුනියාව පොලීසිය මෙම ගින්න පිළිබදව පරීෂණ ආරම්භ කොට තිබේ.
