විස්සයි 20 ලෝක කුසලාන තරගාවලියේ තීරණාත්මක ඔස්ට්රේලියා – ඉන්දියා තරගය නිමය. ඉන්දියාව ලකුණු 24ක විශිෂ්ඨ ජයක් සහිතවය. ඔස්ට්රේලියාවේ මේ තරග පරාජයත් සමග හෙට පැවැත්වෙන ඇෆ්ගනිස්ථාන බංගලාදේශ තරගයෙන් දිනන කණ්ඩායම මත ඔස්ට්රේලියාවේ ඉරණම සහතික වනු ඇත්තේය. ඇෆ්ගනිස්ථාන කණ්ඩායම ජයග්රහණය කළහොත් අවසන් පුර්ව වටයෙන් ඔස්ට්රේලියාව විසිවී යන්නට නියමිතය.
එසේ වුවහොත් එය ඉතිහාසගතවන විසිවීමක් බව ලියා තැබිය යුතුය. සුපිරි අටදෙනාගේ වටයෙන් ශ්රී ලංකාව, පකිස්ථානය මෙන්ම නවසීලන්තයත් විසිවී ගියේය. ඇෆ්ගනිස්ථානය සහ ඇමරිකාවත් බටහිර ඉන්දීය කොදෙව් කණ්ඩායමත්, සුපිරි අටදෙනාට ආවේය.
මේ වනවිට අවසන් පූර් වටයට දෙවැනි ඛාණ්ඩයෙන් දකුණු අප්රිකාවත්, එංගලන්තයත් සුදුසුකම් ලබා ඇත. පළමු ඛාණ්ඩයන් ඉන්දියාව සුදුසුකම් ලබා තිබේ. හෙට ඇෆ්ගනිස්ථාන බංගලාදේශ තරගය ඔස්ට්රේලියාවේ ඉරණම තින්දු කරන තරගය වී තිබේ.
අද තරගය
අද තරගය පැවතියේ සෙන්ට් ලුසියා හි ඩැරල් සමී ජාතික ක්රිකට් ක්රීඩාංගනයේ දී ය. කාසියේ වාසිය දිනූ ඔස්ට්රේලියානු කණ්ඩායම පන්දු රැකීම තේරූහ. එම තේරීම බරපතල ලෙස ප්රශ්න කරන ඉන්දීය පිති ප්රහාරයක් ඔස්ට්රේලියානු පන්දු යවන්නන් වෙත එල්ල වුනේය.
ඉන්දිය නායක ආරම්භක පිතිකරු රෝහිත් ෂර්මා අමතක නොවන පිතිකරණයක නිරත විය. ඔහු පන්දු 42ක දී ලකුණු 92ක් ලබා ගත්තේය. ඊට හයේ පහර 08කි. හතරේ පහර 7කි. රෝහිත්ට ශතකය අත් හැරුණේය. එහෙත් ඔහු ලෝක වාර්තාවක් පිහිටවූයේය.
රෝහිත් ෂර්මා විස්සයි 20 අන්තර්ජාතික තරගවල දී වැඩිම ලකුණු ලබා ගත් ක්රිඩකයා බවට පත් වූයේය. මෙපමණකල් එම වාර්තාව තිබුනේ පකිස්ථාන නායක බාබර් අසාම් අතේය. බාබාර් අසාම් විස්සයි 20 අන්තර්ජාතික තරගවලදී ලකුණු 4146ක් රැස් කරගෙන සිටියේය. ඉන්දියාව වෙනුවෙන් මෙතෙක් අන්තර්ජාතික එක් දින තරගවලදී වැඩිම ලකුණු ලාභියා ලෙස වාර්තාගතව සිටියේ විරාට් කෝලිය. කෝලි ලබාගෙන තිබුණෙ 4103කි.
රෝහිත් ෂර්මා මේ විශිෂ්ට වාර්තාවට යන්නේ ඉන්දීය කණ්ඩායම කිසිවෙකුට ලඟා වීමට අපහසු උසකින් ඔසවා තබමිනි. විරාට් කෝලි පන්දු 05ක මුහුණ දී ලකුණු නොලබා දැවී යන විට, රිෂාබ් පාන්ට් ලකුණු 15කට දැවී යනවිට පීඩනයක් නොගෙන අතිශය ප්රවේගකාරී පිතිකරණයක නිරතවූ රෝහිත් ෂර්මා අද රූපණය කළේ වෙනම පිතිකරණ පෞරුෂයකි.
සූර්යකුමාර් යාදේව් පන්දු 16ක දී හයේ පහර 2ක් හා හතරේ පහර 3ක් සමගින් ලකුණු 31ක් ලැබුවේය. ශිවම් ඩුබේ පන්දු 22ක දී ලකුණු 28කි. ලබා දුන් පහසු උඩපන්දුව අත්හැරිමෙන් ලද ජීවිතයෙන් ප්රයෝජන ගත් හර්දික් පාණ්ඩ්ය පන්දු 17ක දී ලකුණු 27ක් ලැබුවේය. ඉන්දියානු කණ්ඩායම පන්දු ඕවර 20 අවසන් වනවිට කඩුළු 5කට ලකුණු 205කි.
පන්දු යැවීමේ දි මිෂෙල් ස්ටාර්ක් ලකුණු 45ට කඩුළු 02ක්, මාර්කස් ස්ටොයිනිස් ලකුණු 56කට කඩුළු 2ක් සහ ජොස් හසල්වුඩ් ලකුණු 14කට කඩුල්ලක් ලැබුවේය. කඩුළු අඩුවෙන් ලැබුවත් පන්දු ඕවර 4 තුළදී ඔහු ඉන්දියානු පිතිකරුවන්ට ලබා දුන්නේ ලකුණු 14ක් පමණි. හසල්වුඩ්ගේ පන්දුකරණ්ය ඔස්ට්රේලියාවේ හොඳම පන්දු යැවීම බව ලියා තැබිය යුතුය.
පිළිතුරු ඉනිම ක්රීඩා කිරීමට පැමිණි ඔස්ට්රේලියානු කණ්ඩායමේ විශිෂ්ට ආරම්භක පිතිකරු ඩේවිඩ් වෝනර් ලකුණු 06කට දැවී ගියේය. එහෙත් ට්රවිස් හෙඩ් ඔස්ට්රේලියානු කණ්ඩායමේ බලාපොරොත්තු දැල්වූ අගනා පිතිකරණයක නිරත විය. ඔහු පන්දු 43ක් තුළ ලකුණු 76ක් ලැබුවේය. ඊට හතරේ පහර 09ක් සහ හයේ පහර 04ක් ඇතුළත් විය.
ට්රෙවිස් හෙඩ් සහ නායක මිචෙල් මාර්ෂ් ඔස්ට්රේලියාවට ජයග්රහණයේ බලාපොරොත්තු දල්වන පිතිකරණයක නිරත විය. මාර්ෂ් පන්දු 28ක දී ලකුණු 37ක් ලැබුවේය. දෙවැනි කඩුල්ල වෙනුවෙන් ඔවුන් දෙපළ ගොඩනැගූ සම්බන්ධතාවය ලකුණු 81කි.
එහෙත් ඉන්දීය පන්දු යවන්නෝ එල්ල කලේ දැවැන්ත පීඩනයකි. අර්ෂ්දීප් සිං, ජස්පිට් බුම්රා, අක්සාර් පටෙල්, කුල්දීප් යාදේවි සිය වගකීම ක්රිකට් වෘත්තිකයන් ලෙස කණ්ඩායමට ලබා දුන්හ. ග්ලෙන් මැක්ස්වෙල් පන්දු 12ක දි ලකුණු 20කට, ටිම් ඩේවිඩ් ලකුණු 15කට දැවී ගියේය.
ඔස්ට්රේලියානු කණ්ඩායමට පන්දු ඕවර 20 අවසානයේ දී කඩුළු 7ක් දැවී ලබා ගත්තේ ලකුණු 181කි.
අර්ෂදීප් සිං පන්දු ඕවර 4 තුළ දී ලකුණු 37කට කඩුළු 3ක් දවා ගත්තේය. කුල්දීප් යාදේවි ලකුණු 24කට කඩුළු 02කි. ජස්පිට් බුම්රා, ඇක්සාර් පටෙල්, කඩුල්ල බැගින් ලැබූහ. අවසානයේ ඉන්දියාව ලකුණු 24කින් දිනුම්ය.
තරගයේ වීරයා රෝහිත් ෂර්මාය.
