ජාත්යන්තර ප්රජාව අතර ශක්තිමත් සම්බන්ධතා පවත්වාගෙන යාම මෙරටට අතිශය වැදගත් බවත් එම සම්බන්ධතා ඉදිරියේදී තවදුරටත් වර්ධනය කිරීමට පියවරගන්නා බවත් කම්කරු හා විදේශ රැකියා අමාත්ය මනූෂ නානායක්කාර පැවසුවේය.
එක්සත් අරාබි එමීර් රාජ්යයේ පිහිටි ශ්රී ලංකා තානාපති කාර්යාලය විසින් නිදහස් දිනය නිමිත්තෙන් පවත්වන ලද රාජ්ය තාන්ත්රික උත්සවයට එක්වෙමින් අමාත්යවරයා මේ බව කීවේය.
මෙම සැමරුම එක්සත් අරාබි එමීර් රාජ්යයේ අබුඩාබි හී ෂැංග්රි-ලා හෝටලයේදී පැවැත්විණි. මෙම අවස්ථාවට එක්සත් අරාබි එමීර් රාජ්යයේ පිහිටි විදේශ තානාපති කාර්යාල 120 ක පමණ ප්රධානීහූ එක්ව සිටියහ.
මෙම අවස්ථාවට සම්භාවනීය අමුත්තන් ලෙස අජ්මාන් රාජකීය පවුලේ සාමාජිකයෙකු වන ෂෙයික් හුමයිඩ් බින් රෂීඩ් අල් නුඅයිමි සහ එක්සත් අරාබි එමීර් රාජ්යයේ ජාත්යන්තර සංවර්ධන කටයුතු සඳහා විදේශ කටයුතු සහ ජාත්යන්තර සහයෝගිතා සහකාර අමාත්ය සුල්තාන් අල් ෂම්සි එක් වූහ.
ශ්රී ලංකාව සහ ජාත්යන්තර ප්රජාව අතර ශක්තිමත් සබඳතා වර්ධනය කිරීමේ වැදගත්කම අමාත්යවරයා මෙහිදී අවධාරණය කළේය.
පැමිණ සිටි අමුත්තන්ව මෙරට ආහාර වලින් සංග්රහ කිරීමට පියවර ගෙන තිබිණි. මේ අතර මෙරට ප්රවීන නර්තන කණ්ඩායමක් වන චන්දන වික්රමසිංහ සහ නර්තන ශිල්පීන්ගේ සංසදය සාම්ප්රදායික සංගීත සහ සංස්කෘතික ප්රසංග වලින් උත්සවය වර්ණවත් කිරීමට සමත්විය.