මනම්පිටිය නිමල් ජයරත්න –
පොළොන්නරුව මහවැලි බි කලාපයේ දිඹුලාගල මහවැලි කොට්ටාසයේ පළමු වරට මැද කන්නයේ වගා කරන ලද වී වගාවේ අස්සනු මේ වනවිට නෙළෙමින් පවතින අතර ඒ සඳහා තම ගොවීන්ට හොඳ මිලක් සහ අස්වැන්නක් ලැබී ඇති බව ඉද්දපිච්ච වැව බෙදුම් ඇල ගොවි සංවිධානයේ සභාපති ඩබ්ලිව්.උෂාන් වික්රමසූරිය සඳහන් කරයි.
මේ වනවිට නාඩු අමු වි කිලෝවක් රුපියල් 122 කට සහ වේලන ලද නාඩු කිලෝවක් රුපියල් 140 ක මිලකට පොළොන්නරුවේ වී මෝල් හිමියන් ලබාගනිමින් පවතින බවද ගොවීන් සඳහන් කරති.
මහවැලි බි කලාපයේ පළමුවරට මෙවර මැදකන්නයේ තම ගොවි සංවිධාන යටතේ කුඹුරු අක්කර 600 යක නාඩු වී වගා කර ඇති අතර ඒ අනුව රජයට මෙවර වී කිලෝ ලක්ෂ එකොළහක් ලබාදීමට හැකියාව පවතින බවත්, එක් ගොවියකුගේ ආදායම රුපියල් ලක්ෂ හය ඉක්මවන බවත් වික්රමසූරිය පෙන්වා දුන්නේය.
ශ්රී ලංකා මහවැලි අධිකාරිය මගින් 1983 වසරේදී කුඹුරු ඉඩම් ලබාදීමෙන් අනතුරුව මහවැලි බි කලාපයේ මැද කන්නයේ පළමුවරට වගා කරන ලද මෙම කන්නය ඉතා සාර්ථක වූ බවත්, ඉදිරියේදී තමන් වගා කරන කුඹුරු සඳහා වගා ණය සහ මහවැලි ජලය ලබාදෙන්නේ නම් රජයට මෙන්ම තමන්ට ද අමතර විශාල වී අස්වැන්නක් සහ ආදායමක් ලබාගැනීමේ හැකියාව පවතින බවත් ඉද්දිපිච්ච වැව බෙදුම් ඇළ ගොවි සංවිධාන නියෝජිතවරු සඳහන් කරති.
පොළොන්නරුව දිස්ත්රික්කයේ මහා පරිමාණ වී මෝල් හිමියන් මේ වනවිට තම කුඹුරු වලටම පැමිණ තරගකාරී ලෙස නාඩු වී මිලදී ගැනීම ආරම්භ කර ඇති බවත්, මහවැලි බී කලාපයේ දිඹුලාගල කොට්ඨාසයේ තම ගොවි සංවිධානයට පළමුවරට මැද කන්නයක් ලෙස වගා කිරීමට සහයෝගය ලබාදුන් මහවැලි අධිකාරී නිලධාරින්ට මෙන්ම සියලු නිලධාරීන්ට තම ස්තුතිය ප්රකාශ කරන බවත් උෂාන් වික්රමසූරිය වැඩිදුරටත් සඳහන් කළේය.
