ශ්රියානි විජේසිංහ –
මාස 6කට අධික කාලයක් කණ්ඩලම වැව් තාවුල්ලේ ප්රතිකාර ලබමින් සිටි ‘කණ්ඩලමේ හැඩකාරයා’ වන අලියා අද (13) පස්වරුවේ සිය වේදනාත්මක ජීවිතයට සමු දුන්නේය.
වයස අවුරුදු 25 -30 අතර පසු වූ මෙම සුන්දර සද්දන්තයා ඉදිරි පාදයකට එල්ල වූ වෙඩි ප්රහාරයකින් තුවාල ලබා අසාධ්ය තත්ත්වයෙන් පසුවිය.
මේ සතා අන්ත වද විඳ මිය ගියා නොව මිය යන්නට හැරිය බවට චෝදනා තිබේ. කන්ඩලමේ අලියාට ප්රතිකාර කිරිම සඳහා පේරාදෙණිය විශ්විද්යාලයේ පශු වෛද්ය අංශයේ මහාචාර්ය පශු වෛද විශේෂඥ අශෝක දංගොල්ල වැනි විද්වතුන්ට මේ සත්ත්වයාට ප්රතිකාර කිරීමට ලිඛිත ඉල්ලීමක් නොකර මේ සතාට සිංහල වෙදකම් කිරීමට ගිය බවත්, ඉන් පසු පශු වෛද්යවරුන් ප්රතිකාර කිරීමෙන් බැහැර වූ බවත් වාර්තා වූයේය.
ලංකාසර කළ විමසීමක දී මහාචාර්ය අශෝක දංගොල්ල පැවසුවේ දළදා පෙරහර පැවැත්වීමට පෙර තමා ඇතාව පරික්ෂ කළ නමුත් සතාට ප්රතිකාර කිරීමට තමාගේ සහය ඉල්ලිමක් නොකළ බවත් ප්රතිකාර කිරීමට කොපමණ මුදල් යන්නේද පිලිබඳව පමණක් වනජීවී දෙපාර්තමේන්තුව ඇස්තමේන්තුවක් ඉල්ලා සිටිබවත් මහාචාර්යවරයා පැවසුවේය.
තමා කරනුයේ සතුන්ට ප්රතිකාර පමණක් බවත් ඇස්තමේන්තු ඉදිරිපත් කරන්නෙකු නොවන බවත් මහාචාර්ය දංගාල්ල ලංකාසර වෙත අදහස් දක්වමින් පැවසුවේය.
