ධූරයෙන් ඉවත් වී වසර හයක් පමණ ගතවී ඇතත් හිටපු විපක්ෂ නායක ආර්.සම්පන්ධන් විපක්ෂ නායකවරයාට හිමි කොළඹ 07 මහගමසේකර මාවතේ නිල නිවසේ දිගටම රැඳී සිටින බව වාර්තා වේ.
වර්ෂ 2015 ආගෝස්තු පැවති මහ මැතිවරණයෙන් අනතුරුව ආර්. සම්පන්ධන් විපක්ෂ නායක ධූරයට පත්වීමෙන් අනතුරුව එම නිල නිවස ඔහුට ලබා දී තිබිණි.
වර්ෂ 2018 ඔක්තොම්බර් මාසයේ 26 දා මහින්ද රාජපක්ෂ අගමැති ලෙස දිවුරුම් දී පිහිටවූ දින 52 ආණ්ඩුව වෙනස් වීමෙන් පසු විපක්ෂ නායක ධූරයට පත් වූ මහින්ද. විපක්ෂ නායක නිල නිවස දිගටම සම්පන්ධන්ට පාවිච්චි කිරිමට ඉඩ හැරියේය.
පසුව ඔහු දෙමළ ජාතික සන්ධානයේ නායකයා ලෙස කටයුතු කරන තුරු පාවිච්චි කිරීම සඳහා අදාල නිල නිවස ඔහුට ලබා දී ඇත්තේ පසුගිය යහ පාලන ආණ්ඩුවේ ඉඩම් හා පාර්ලිමේන්තු කටයුතු ඇමතිවරයා වූ ගයන්ත කරුණාතිලක විසිනි. ඒ වර්ෂ 2019 පෙබරවාරි 26 වැනිදා ඉදිරිපත් කළ කැබිනට් පත්රිකාවකට අනුමැතිය ලබා ගැනීමෙනි.
සම්පන්ධන් දෙමළ ජාතික සන්ධානයේ නායකත්වයෙන් ද පසුගි දා ඉවත් වූ අතර දැන් ඔහු පාර්ලිමේන්තු මන්ත්රීවරයෙක් පමණි. එහෙත් තවමත් ඔහු විපක්ෂ නායක නිල නිවස භුක්ති විඳිම වැරදි පුර්වාදර්ශයක් බව රාජ්ය පරිපාලන අමාත්යාංශ ආරංචි මාර්ග පවසයි. – ලංකාදීප
